طفح كيل الصبر راح اكشف المظموم
والبكلبي يكلك بي تره لساني
راح اعلنهه احبك خلي كلشي يصير
انته اسمي وحياتي وانته عنواني
موداعي تحبني وانته حربهاي
بس من طرف واحد حبي للثاني
عذبني بصدودك واني راضي يصير
حبك موت وبحبك اموت اني
صح عندك قساوه وتظلم الحبوك
بس ظلمك احسه بقسوته انساني
لو تسألني واعرف ليش احبك ليش
اكلك ما شفت مثلك ابد ثاني
بعيونك تلم انته اظن سبع بحور
واحس تفاح خدك والله لبناني
ورموشك حرير وحاجبك مرجان
وشعرك ما اوصفه اعجاز رباني
واشوف الحلك جنه وشفتك بستان
والركبه مناره ونقش سلطاني
احس اتعب اذا اعد الجمال البيك
جمالك حتى روحي انساهه خلاني
من شفتك كلت لاهذا مو انسان
اظن هذا ملاك من السمه وجاني
ومن اسمع بأسمك عقلي مني يطير
واظل يم بابك احرك روحي ومتاني
وكطعت الوريد وردت اشوف اشبيه
مودم انته تجري بوسط شرياني
اذا كلبي تريده شلون ابخل بيه
وانه بكل وكت شمعه الك تلكاني
اخذعمري الك جذب عليه شبيك
وكلي اني احبك وارضه اموت اني
نسيت انه الفرح من كمت اني اهواك
واسولف وي دمعتي هواك خلاني
مااركص طرب لتغرك الظحكات
اقشمر روحي واضحك ويه احزاني
اعتقد حظي الدمع والاه والويلاه
وهمومي ارضعتني وحزني رباني
واول ما عرفت الحب خذتني الروح
وجابتني عليك وجدمي وداني
من شفتك كلت لو هو لو ما اريد
واكتل روحي لو ما ردت تهواني
بقلمي الشاعر محمد الحميداوي 25/12/2010