قصيدتين لل........ما ادري

إذا تسال طفلنه ((اشلونك)) ايكول:
يعمي شلوني وهل شاب راسي
فطنت اعله الحروب وعوز وإرهاب
ورضعتني بثداياها الماسي
وشفت وادم اذا تتخيل الميز..
اعله ربه من تنشده يكول ناسي
مستقبل وطن ميهمه لو راح
عنده البوك بس همه الاساسي
واذا هيج السياسة اتخرب الناس
اذا.. من حقي اكره كل سياسي
نفضل مثل ماالله خلقنه
نعيش احرار حتى بلا جناسي
الوطن يحترك كله وللسمه النار
يطفه شلون..؟ بالحجي الحماسي..!؟
عفانه اشكد حملنه اجروح واهموم
ثكلهن يفصم اظهور الرواسي
اخو يكتل اخو.. والاجنبي يصول
ونتذابح على الكرسي الرئاسي
الف رحمه اعله ابو العامل وفلاح
والا تبا على السوه الكراسي
المايخلص الشعبه اتدوسه الاقدام
واليخلص اخليه اعله راسي

ابوكت ماحاجته يمي اجاني
مثل جية اخو يكضني او يحبني
أكلني بالسلام وبالتحيات
وبكلاص المدح ماي وشربني
كتله: كول واطلب خاف محتاج؟
أصيرن انه خادم للطلبني
كلي: رشحت للانتخابات
الف رحمه اعله موتاك انتخبني
كتله: الكبلك احنه امن انتخبناه
التهه ايبوك النفط وقصور يبني
خجل باجر أشوف انغلب مرتين
وبعدني ابجرح امس ذاك الغلبني
راجعته اعله شغله الابني خريج
نهرني وكلي: خل يشتغل ابني!؟
وسد ابوجهي بابه وجيت مهضوم
اخاف اعتب عليه .. يرجع يسبني
اذاً .. من حقي اشك اباقرب الناس
لان شفت العجبني ماعجبني
لكن هسه.. لا فتحت بالجير
وكشفت اللي يحبني وما يحبني
وتبقه اجفوفي والأيام غربيل
والغربيل يفرز.. ماتعبني
الخشن يبقه خشن كلما تهز بيه
والناعم يكلك :كوم ذبني

للامانة للشاعر- مهدي عبود السوداني

[السومري71]

الأخ الأمير سامر
هو هذا حالنا ومع كل اسف
اصبح العراق سلعه تباع وتشترى على السن من هب ودب
ولم يبقى للعراقي المظلوم غير الحسرة وخيبة الأمل
فشكرا لك على هذا الأنتقاء الأكثر من رائع
تحياتي لك وللشاعر مهدي عبود السوداني

الأخ الأمير سامر

هو هذا حالنا ومع كل اسف
اصبح العراق سلعه تباع وتشترى على السن من هب ودب
ولم يبقى للعراقي المظلوم غير الحسرة وخيبة الأمل
فشكرا لك على هذا الأنتقاء الأكثر من رائع

تحياتي لك وللشاعر مهدي عبود السوداني

جزيل الشكر والتقدير لك اخي