بجيت عليك حد مانشفت العين
وزرع روحي يبس لمن عفتني
اتخذتك روح حتى بداخلي تعيش
وعشت وياك لكن ماشفتني
تبيع اشلون حبنه التارس الكاع
وراح تندم من بعتني
انه المأخونك حتى وياي
وانته عالجرح بيدك جبتني
صار سنين بس اتباوع عليك
وتغرك باخجل لو باوعتني
هسه اختلف كلشي وصار ماصار
ولئن وياك طيب ماردتني
تحط ايدك بأيدي تكول ماخون
بعد شتريد وثبتلك خنتني
مو لعبه العشك ويخلص بساع
ولو بالضيم فعلا لعبتني
كبل انه علمودك اسهر الليل
وابوس بصورتك حد مابستني
حسبتك عيد وانه الطفل الصغير
وأعيشنً بيك لكن ماعشتني
صرح حبي عله كلبك صارله سنين
وبزلزال حجيك هدمتني
ومشيت وياك وانه مغمض العين
ويم البير بيدك وصلتني بيدك طيحتني
طحت مجروح وتبجيني
وكلك فرحتني
حلم بالنوم انته بعيني مريت
عله جروحي مشيت وفززتني
برد بيدي الجمر حد ماثلج صار
ومصخ عندي الملح من فاركتني
مر طعم العسل بشفافي حسيت
لئن بالمر مراراً ضوكتني
السفن تعطش نعم بس يغدر الماي
وأول ماشربتك غركتني
ياحب عنه اسولف واحجي وياك
انه ألتميت وانته الطشرتني
ياحب عنه اسولف واحجي وياك
وانته عالحب كرهتني
ياحب عنه اسولف واحجي وياك
وانته بحبل طبعك جتفتني
ياحب عنه اسولف واحجي وياك وانته عالحب كرهتني
:
منقول