صرت مثل السفينه الّلي يمرها إعصار
على ظهري الخطر والموت بشراعي
أشـوف الموج بعيوني واحـس بالنـــار
وردت انـزع ذنوبـي وكثـرة اطماعي
تذكـرت الوطـن والشـاطـي والمـعـبار
وتذكـرت الحبـيــبـه وعـزبـة الـراعي
وتمنيت الربـوع الخضره فيهـا امطار
وعلى ضفاف الفرات يصير مرباعي
وتخيـلـت الربابـه وصوت ابـن عگار
يناجـي الذيـب بسـمه وحـيـل ملتـاعي
على ليـش تعـوي او ليـش منـي تـغار
وحالـك مثـل حالي يصير... لا داعي
وشفت فالـه تعيـــّر هيبـــة المگــــوار
وتصرخ في عيونه تصيح يا گاعــي
وسمعـت ام اليتامـى تصيــح يا ســتار
اذا ماظــل عــــدل يا خيبــة الســاعي
واكو نايم صحى ويگول شنهو الصار
فهمونـــي ترانــي بنــوب مــو واعـي
إرجـع نـام لا تصحـى يديــچ الفــــــار
ترى امثالـك يضيف اوجاع لاوجاعي
انا معجـب بجحــا وشغلـــة المســـمار
وحگه من يزور الحيط كل ســــــــاع ِ
وحگها من تعــوف النـاس لــه الــدار
الخلل بالنـاس لأمـره ليـش تنصاعـي
الوطــن محتـاج نـاس تجـدد ألأعمــار
بذراعـــك يخــوي نعيـــده وذراعـــي
النخـــــل هيبــة اذا قارنتـه بالأشــجار
والأســــد ما ينتظـر لو جاع الضباعي
عراقـي آنـي يحلـوه وما أدانـي العــار
ولا تقبــــل معانــي الــذل أوضاعــي
اضيع ويه ألعــراق ان صــار للكفــار
وانبـت مـــن صبر اخبـاري تنــذاعي
تعالي للغــــزل خــل يزعــل المختـار
وميهمنـــي ابــوچ ان يكــسر كراعـي
أنا بصــدرچ تركــت شفاهـي للتذكـار
وتصيريلـي احبـچ لو متــت ناعـــــي
يا أتـــرف وجــه مـن رقـــة ألأهــوار
ومن دجله ارتـوت وتعيــش بنخاعــي
لفتــات الكريـم ان جاد كلـهـا كبــــــار
ويجيچ الخيـر منـه اشــكال وانواعــي
تعالي هاتــي أيـدچ خـل نــرد زغــار
ونرسم عالخريطـه اســوار القلاعـــي
صرت مثل السفينه الّلي يمرها إعصار
على ظهري الخطر والموت بشراعي
الكناري
يونس الجبوري
23/5/2010
رد مع اقتباس