{ملحمة فرگه}
....
ملحمة فرگه..
البطل بيها الالم
روحي محترگه..
وأحس چنك صنم
فاهي الملگه ...
بلا لذه وطعم
وانا لبفرگاك ميّت
موزر بدمعاته جفني
وشايل برمشه الالم
فكري شارد
كلشي شارد
گلبي شارد
فوگ گاعد...
مثل طيارة كواغد
الريح لعبت بيها
مثل ما تلعب على اطراف بعلم
وانا شوگي..
أبد مني مايكف
چنه بجناحين طيره
طاير بگلبي ويرف
وانا متامل يگلي
انته روحي
انته خلّي
وانته بس أنته الولف
أنته كل بوسات
عيد الناس لو بستك قليل
انته تستاهل اشفافي
تظل بخدودك دليل
تظل مرسومه أعله خدك
مثل شفه فوگ دفتر
من دفاتر دار دور
تحلم بفراشه بيضه
فوگها تلف وتدور
ثاري مو أنته هذاك
وهذا مو هوه هواك....
البفكر شيد هرم
البگلب لوحه رسم
.....
ملحمة فركه ...
البطل بيها الالم
ياحبيبي چنت لجلك
آنا لجلك منكسر
انا صايرلك جسر
ونحنى ظهر الجسر
شيب أبوكت الشباب
راد ينهض ماگدر
الشاطي ظل يبچي عليه
ولجله حزنانه المراكب
وحته الورود...
أنحنت يم الضفاف
النهر جاف
صار چن مثل اليتيم
وانعمى الشاطي القديم
وماتت بصبخه القوافي
ومانفع بيها مطر
وانذبح راس الشعر
والورق نام وشخر
وما گعد صوت الحرف
ولا رفع راسه الألف
ولا حچه چلمه النثر
وذبح حنجرته...
أعله شفتين النهر
وخلبص الطير الشبچ...
وبعيد طار
وطاب بجناحه الكسر
وكتب بجناحه المصير
والشمس بالعين ضوّت
أقصد بعين البصير
وطافيه بعين اليشوف
مثل ما تضوي ...
وترد تطفه الحروف
العيد مر بيه حزن
والفرح مخنوگ...
بشفاف الدفوف
والگمر
آه الگمر
أچتاف مچتوف الگمر
بالغيم مايگدر يطوف
ياعجب كل العجب

كلشي بالدنيه انگلب
الفاسه ياكلها الخشب
الورق يطفيه اللهب
السيف يحنيه الگصب
أللا...رافض يبقه...لا
وصار بعد اللا ...نعم
كلشي صاير من وهم
.......
ملحمة فرگه..
البطل بيها الوهم
أذكر آنا
مره جربته...
عشگ هذا الزمان
وركبت باص الحنان
وگفه وزحمه
ولا باقي مكان
وبين روحي گلبي گلّي
گالي خاف انتچوه
وقشمريته
وقنعيته
قنعيته يروح گوه
النار ماخلت مكان
أذكر أنا گلبي گلّي
الباص صدك مو امين
خاف ناصبلي كمين
لاتراهن
گلي خسران الرهان
ومو حقيقيه الوجوه
كل وجه لابس قناع
بالشفايف كلمه حلوه
وبدواخلهم خداع
أذكر آنا
گلبي گلّي عاشرتهم
گلي والله جربتهم
والتجربه خير أمتحان
حته درب وعودهم ...
مابيه أمل كله عذاب
حته لون أعيونهم
مابيه بحر شايل سراب
گلي أرجع
گلي اقنع
گلي ماتذكر حبيبك...
الگلت عنه يعود
يجيب گلبه ويا الورود
وينقش اسمك...
بالگلب مثل الوشم
هذا اجه...ماچنه هوه
وهوه بالشريان دم
....
ملحمة فركه...
البطل بيها الألم
......
كلمات
ناصر اسماعيل الموزاني