عالحب گتلك البي تضحية يعيش

[احلاهن بطة]

عالحب گتلك البي تضحية يعيش
خذت رايي وسمعته وبية ضحيت


وشفت حفل افتتاح جروحي للناس
وشفتك من بعيد بروحي گصيت


طرت ﭽن دمعة وبجنحينها رموش
وعلى شجرة ضحكتك سكته حطيت

خيل ظنوني طلعت خيل عرجاء
وانا مراهن عليها تفوز ظنيت


من شفتك اطش سنيني واللة لأن بيهن حلا حسبالي ﭽكليت
غشيم وگلت ماساوي اليلمون
عزت نفسي ما خلتني لميت

انا بالا وعي
من اطيتك الروح
وعقل ماﭽان عندي وهسة فزيت


ماﭽذب واگلك باﭽر انساك
عفتني وذكريات هواية خليت


اذا كل حايط البي اسمك يطيح
على هالحالة لازم نهدم البيت

بأخير ايام عشت بروحك هواي
ديرة شايلين ووحشة حسيت

ظلمة وريح بيها وصوت بيبان
وردت اطلع ولكن ما اندليت

انا الباني السفينة ومو مثل نوح
صعدتك وبالطوفان ظليت

وﭽبت عشب الخلود اطيتك اياة
وگلت احمل الفشلة وخالي رديت


بحرگتي وخفت تدريجيآ اشتاق
وخفت ردود قلبي يگلي حنيت

من دمعتي لحجيك وكت الوداع
خط وهمي بوكتها ﺒﭽفي جريت

طلاسم نظرتك فكتها الاعذار
وبعيونك شگد الغاز حليت


ﭽنت ﺘﺤﭽيلي وايدي تهدم احلام
وبمعول دمعتي بقوة دگيت


بحيث من انتهيت من المواضيع
ذﯾﭺ الساعة ماظل كلشي هديت


فدة من ﯾﻨﭽفي يگولون عالماي
وفدوة شلون اگلك ماتبديت


انا شفتك ثلج بحلوگ شمات
معقولة بحلگهم ما حتريت


ماگتلي الرواية اخرها مبتور
ﭽا بأول مشاهد مانشديت


ولو ادري اليظل ممنوع مرغوب
لارخصت روحي ولا انذليت


انة ابحرت بيك اعناد عالروج
وعلى خصر الشراع وزار شديت


الهوة هذا اليمرني اتخيلك بي
حته التقي وياك منين ماجيت


يعني بمعنى اخر مستحي اﺤﭽية
ترة بس انته غيرك ماشتميت


وحررت اسمك من شفايف الغير
وعلمودك شگد حروب طبيت

وبعدت ذرائع قادر اجتاح
ولكن شبر منك ما أحتليت



اكض الليل بيدي من اوگف وياك
بدليل شگد عليك نجوم طشيت

ﭽنت اگدر اجيك بدون عنوان
وحته ادخل بگلبك لو اضطريت



علي محسوب سر وانته مگيول
وعلى ازغر اعدائك ما انظميت


ما عندك عذر ينگال للناس ؟
يمي ومن ﺤﭽيهم ما افتكيت



لهسة اكل بصبعي الاشرت بي
عليك وبي الف نيشان خليت


مثل حب الارض وية الشمس بي
ﭽنت سطحي بنظرتي وفطرة حبيت


لو ادري الشمس ماتفتر وياي
على روحي بعشرتك ما افتريت


انة عابيت حته عيوني ﺒﭽفاك
بيهن وبنظرهن مااعتزيت


مر يم بيتنا مستطرق وشوف
تلگة اباب بيتي عيون ذبيت


انة ظهري احترف طعنات العزاز
وگمت اعرف اديهم لو اندﭽيت


بلا شوف واگلهم ها منو فلان
بس انته عكسهم ماتسميت


حته انساك لازم ينلغي الليل
اذا بالليل اذكرك ﭽا سويت


واحتار من اظل ابين رائين
اذا عن رأي منهن ما استغنيت


بما انك عفتني بكل الاحوال
ماتفرق نسيتك لو تناسيت



من روائع الشاعر
ايهاب المالكي

قصيده رائعه والله
شكرا

[سفيره الشعر]

قصيده روعه لايهاب المالكي


تقبلي مروري

[ابو سجاد الركابي]

احلاهن بطه\شكرا لهذه القصيده المعبره وشكرا لهذا النقل الرائع تحياتي اليك

[ابواياد56]

شكرا على هذهي المشاركهالجميله

[ابو سجاد العتابي]

احلاهن بطة قصيدة رائعة للشاعر ايهاب المالكي
ونقل جميل وصادق اتمنى منك المزيد
تقبلي تحياتي
ابو سجاد العتابي امريكا

[احلاهن بطة]

مودتي وامتناني
لكل من ترك عبيرآ جميلآ من الورد
في موضوعي المتواضع
تقبلوا تحياتي

قصيده جميله
نقل مميز
نقاوه في الاحساس
دام هذا الابداع
تمنياتي لكي بالخير والسلامه