انه ضد هذا التطور منقول
صح قبل شارع ترابي بلا رصيف
والصريفه البيها قاعد تمطر المي على كيف
لكن احسن
ماكوه التبليط رجلي ولانمت فوق الرصيف
قبل حمام بصريفه ردي وبأردأ
وشتا وبارده
وبابه برده
وكلنا ماخذنا الرجيف
هسه كيزر ماي حار ((سخان ماء حار)) ودوش عدنا
وبالألف .. واحد نظيف
قبل تنور اهلي طين والصديق يصير اخوي لو علي مرة يضيف
هسه من صار الخبز عالكهرباء ضل يحط عينى على اختي وهوه ياكل بالرغيف
انا ضد هذا التطور .. موشريف
لاتكولي انسان رجعي .. الناس صعدت للقمر
ارفض اصعد للقمر حتى ما اصيرن خفيف
قبل خبز شعير ناكل
ولو شبع واحد يصدق عالفقير
حتى عن ذنبه يكفّر
هسه جلفراي ناكل
ولو طلب خبزة الفقير نتفل بكصته ونكفّر
انا ضد هذا التطور
قبل بس فانوس عدنه
وكنا كل مغرب نشعله وعالنبي نصلي ونكبر
هسه لو شعلو علينا الكهرباء
حتى شايبنا يصفّر
انا ضد هذا التطور
قبل جان الخص قصب وماتزل عالجار عين
جانت القصبات تستر
هسه طابوق السياج
شويه ناصي
بصفه كرسي
فوقه رجلي
ارفع ايدي
بس اأشر
هيه تطفر
انا ضد هذا التطور بالحياة
عملوا الاف التجارب والبحوث حتى تدخل انظمة وندوز كل الحاسبات
بلكي عدكم حاسبه بأحدث نظام تحسبلكم كم عراقي بلا عشه تعود يبات
وتضرب بنود الحصار وتطرح الهم العلينا
وتقسم ضهور الطغاة
انا ضد هذا التطور ياطغاة
صنعو تلفاز ريموت كونترول حتى محد يتعب بوقت الصلاة
هوه كاعد لوسمع صوت الاذان يدوس دكمه لوحده يبدل قناة
ومارضو عالتفرقه بزي النساء الامريكان
وحده متقبعه بحرير ووحده نص ردن وردان
صممو بوردا حديثه وحققو بيها التساوي
وهسه كلهن عاريات
ان من هذا التطور ما اريد
ما اريد الميرميدا تصمم ازياء النساء حتى لا يتعرى جيد
وما اريد الناطحة تدق بالسحاب حتى لاتعلى العبيد
عندك ايد وعندي ايد
ما اريد بكومبيوتر تنخزن جثة شهيد
قبل طب اعشاب جان يعني لو قلبك يموت تموت كلك ماتفيد
هسه لو قلبك يموت الطب يكولك ماتموت قلب اي تمساح نزرعلك تريد
ولذلك ما اريد
ما اريد كلما اقص كف الحرامي يروح يزرع كف جديد
وما اريد تنغرس نطفة برحم - حتى لا ولد الزنا بوقتك تزيد
وما اريد امريكا تستنسخ بشر - حتى لا كل يوم تستنسخ يزيد
انا ضد هذا التطور
سحبو بليزر رصاصه - يعني نقذو روح واحد بالسويد
وضربو بليزر الف ملجأ عراقي وذابت عضام البشر ويا الحديد
انا مو ضد التطور
انا من هذا التطور ما اريد
للشاعر نائل المظفر
رد مع اقتباس
رد: انه ضد هذا التطور منقول
