أزمة الحكومة انحلت أخيرا.. ورئيس وزرائنا المقبل سيكون هندي.!
بقلم: جلال چرمگا
بعد أن أصبحت مسألة أختيار رئيس الوزراء من ألأمور المستعصية على كل الجهات الداخلية ودول الجوار وأمريكا وبريطانيا والصين ومدغشقر والدول الأسيوية والأفريقية وامريكا الجنوبية .. لابد أن نلحق أنفسنا ونقدم المشورة للأخوة المناضلون الذين يتقاتلون على الكرسي وثروات العراق من بترول ( اللهم ياربي يبسها.. ولا قطرة لكونها سبب كل البلاوي وعوضنا بدلها خيار ترعوزي وشمام وفجل ) حتى نشبع فواكه وخضراوات ونصدر الباقي الى ألأشقاء الذين لديهم بترول أكثر من اللازم وشعوبهم حالهم حال ( الضيم ) بسبب السياسات العوجاء لأصحاب الجلالة من ملوك وأمراء وسلاطين و فخامات وواحدهم ( متبسمر) على كرسيه و (ملزوك لزك بيسكوتين ياباتي أصلي .. ماينشلع الى أن يحضر مستر رنكَو وطلقة بالكَصة .. والله وياك عبوسي !!) ..
اللهم يا الهي بدلا من ها ( النفطات ) زود مياه دجلة الخير والفرات لنتحول الى بلد زراعي وحينها لايهم إذا ما أنحرمنا من الكهرباء وأخوات الكهرباء.. هساع على أساس الكهرباء 28 ساعة باليوم!!.. من عابت هالكهرباء!.
مربط الفرس :
كالعادة كنا في المقهى ( يعني وين أنروح بهالوكت؟) .. وإذا بالأخ / حمدان البغدادي يسير بسرعة ومن الجهة الأخرى للشارع وكأنه ( مستعجل ) ولايريد أن يأخذله أستكان چاي وينورنا بالأخبار..
ـ وييييييييين ؟؟.. أشو حتى سلام ماكو؟.
+ مستعجل.. بعدين أجيكم ..
ـ يا مصخم.. تجي.. لو أجيك؟.
+ جايك وأمري لله ...
كالعادة الحقيبة الجلدية تحت ألأبط.. و( العرك يخر.. أي عليش هالقاط والرباط .. أي مو الدنيا جهنم؟!)
بعد أستقبال حار وسلام وتحيات وآخر الأخبار.. وأخيرا نطق !!.
+ لحد يقاطعني .. بكل المقدسات أنحلت ألأزمة.. لاتسألوني يا أزمة.. أزمة ..
ـ الكهرباء..؟.
+ لاء.. ياكهربااااء.
ـ السجون السرية ؟؟.
+ لااااااااااااااااااء.
ـ أزمة مياه الشرب ؟؟.
+ نو....
ـ هااا.. جوازات السفر؟؟.
+ هم .. لااااء.
ـ تشغيل العطالة والبطالة؟.
+ لاء.
ـ أنسحاب قوات الأحتلال؟؟.
+ لاتسولفها.. هذه بعيدة..
ـ حمدااان.. تحچي لو ..
+ لا لو.. ولا أخواتها.. أنحلت أزمة تشكيل الحكومة.. وبكل سهولة.
ـ الله يبشرك بخير.. يعني كل الكتل تحالفت.. تمام؟؟.
+ شلون تقبلوها..؟؟.
ـ كتلتين تحالفت..
+ هم لاء..
ـ قائمة / علاوي راح تشكل..
+ لاااااااااااااء
ـ لعد شلووووووووون؟؟
+ راح أنجيب رئيس وزراء من الهند !!.
ـ من الهند.؟؟.... ما أفتهمنا..!!.
+ أكيد.. نعني وين ننطي وجهنا؟؟ .. جربنا وجربوا كل الحلول والإقتراحات الموجودة.. وماكو أتفاق.. يعني هو منصب واحد.. يصير أثنين يصيرون رئيسين للحكومة؟؟.. طبعا لاء.. لذلك عندي أقتراح راح أسلمها الى استعلامات / المنطقة الخضراء.. ومن عدة نسخ للرئاسات الثلاث.. وأعضاء البرلمان ورؤساء الأحزاب وسفارات أمريكا وبريطانيا وبقية الدول المعنية بالشأن العراقي مثل ( موزنبيق .. بوركينا فاسو .. جيبوتي.. جزيرة جاوا ألأندوسية .. وغيرهم !!) . .. طبعا هذوله من حقهم يتدخلون.. أكيد.
والرسالة هذه تتضمن أقتراح عظيم.. أن نجيب شخص هندي مسلم وأنسلمه رئاسة الوزراء .. وبهذه الخطوة راح تنحل هذه المعضلة.. لا علاوي.. ولا مالكي.. لاجعفري .. ولا الصدر ..
ـ حمداااان.. أتخبلت..؟؟؟.
+ وداعتكم كلش صاحي.. ماكو غير حل.. وهذه بيها فوائد هواية .. الهندي بطبيعته أمين وصادق .. ما يسرق .. راح يشكل حكومة تنكقراط وناس أوادم.. ماراح يسلم وزارة التجارة بيد الحرامية ولا وزارة الصحة بيد قتلة ومجرمون .. ولا الكهرباء بيد مافيا ولا النفط بيد عصابات التهريب .. يشهد الباري خلال سنة راح أنشوف مئات العمارات السكنية كل عمارة تنطح السحاب !! .. والأهم راح نثبت للعالم بأننا بشر وديمقراطية أمريكا ( فلة مال الله!!) .. ماكو فرق بين هندي وعراقي.. كلنا بشر .. عدى هذه وتلك راح أنشوف على أرض الواقع حقائق ملموسة :
•أضافة التوابل والعمبة والبخور والمانكَا وجوز الهند .. الى الحصة التموينية..
•ألأستفادة من شركات ( بوليود ) السينمائية الهندية.. كل يوم ننتج فلم هندي ـ عراقي مشترك.. ومعلومكم كل فلم بحاجة الى عشرات آلآف من الكومبارس.. سنقضي عالبطالة بين الشباب..
• ستنشط سكك الحديد .. كل فلم هندي لازم بيه قطار .. القطار ينترس حتى السقف .. وبهذا راح نقضي على ألأختناقات المرورية وجشع السواق وتوفير البنزين وأزمة المواصلات ... الخ من الفوائد.
• حديقة الحيوانات راح تنترس بالشوادي( قرود) وفيلة وزرافات وأسود ونمور وطاووس وكركدن وحمار وحشي!!!.
• ستكون لجوازات السفر قيمة.. نعم شلون لاء ورئيس وزرائنا هندي؟... وهذه راح تكون أخر جوازات ماتتبدل راح تحمل حروف ( S. A. L. A. M. A.T. Y. A. I. R. A. Q) وباللغات العربية والكوردية وألأنكَليزية والهندية !!. .. لو نجمع الحروف راح أنشوف جملة : سلامات يا العراق !!.
• تندمج الروبية الهندية والدينار العراقي وأسم العملة الجديدة ( ديناروب) وبيها صورة رئيس الوزراء الهندي.. شواربه يوگف عليه الصگر.. وهو خربان من الضحك ... أحممممممم .. نعني راح نكسر ظهر الدولار وألأسترليني واليورو والين والفرنك !!!.
• إدخال اللغة الهندية في مناهج الدراسية.. نعني ماراح نحتاج الى ترجمة الأفلام الهندية..( شاهيد كابور ) من يركض ورا بطلة الفلم النجمة ( أشوريا ) ويغنيلها( هاجا.. هاجا).. نفهمها لابل نطرب عليها.. يا أم كلثوم؟؟ يا عبدالوهاب.. يا سعد الحلي ؟؟؟ حتى رنات النقال تصيح.. هاجا.. هاجا... هاجا.. هاجا.. هاجا ...
• سيدخل الجيش الهندي على الخط.. شحده اللي يحتل مراكز الحدود.. لو أبار نفط .. الهندي مايتفاهم ومايعرف أبوه.. والله العظيم الليل كله ماينام.. ألأيادي على الزناد و يروح ويجي ويصيح: كررررر.. فررررر.. شرشابه.. مرمابه.. نهينا نرهي !! هدودهي مكبريه.. أيراك.. أيراكنا.. مررررررررررر.. وهذه تعني الويل للعدو اذا أقترب من عراقنا!!!.
• الهند دولة متقدمة في مجال الفضاء وعلم الفضاء.. يوميا ( خري مري) رايحين وجايين للقمر والمريخ.. نعني ممكن يفتحونه شركة سفريات وينقلون ملايين العراقيين للعيش بالمريخ.. وهناك أراضي شاسعة ولا تفجيرات ولا جيران شر ولا ابار نفط ... ولا طلب لجؤ ولاهم يحزنون...!!.
• بإمكننا الحصول على سيارات ( تاتا) وبالتقسيط المريح .. لكل شاب وشابة سيارة ( تاتا) .
• أمتيازات بالعشرات .. ياترى أكو أحسن من هالأقتراح؟؟.
ـ حمدان.. رحم على هذولاك .. فد سؤال.. وهذا ألأخ الهندي المسلم.. شنهو مذهبه؟.
+ هاااااااا... أيباااااااخ.. شلون فاتتني .. والله هذه نسيتها ..!!.
ـ والعمل..؟؟
+ يعني.. راح أشگ الأقتراح.. وخليهم هم ينفصلون بالشغلة .. جيب چاي ياولد .. وياها نيرگيلة أم الريحة !!!!... والله أني هم بطرااااان .. نعني شلون نكَدر أنرضي دولتي (مدغشقر وموزمبيق) بأن واحد . .. يا خسارة عالدراسة اللي سهرت عليها.. وألأهم ياخسارة على المواد اللي كادت تضاف الى الحصة التموينية و الشوادي ( على أساس قليل عندنا شوادي؟).