احنه وين (تساؤلات اخرس )

ربي مليت الكلام
أنه في زمن العجايب
زمن بي احيا بكرامه
مستحيل
لايربي
بل حرام
كلش هوايه حرام
المجتمع يرجع بدائي
خيم والجوله مدينه
بعد ميفيد التحظر
والقصور تطك ترافه
هنانه أفه
هناك أفه
ولاتباوع للامام
الخبر شك الجرايد
حادث المرنه رهيب
حادث المرنه انتقام
وللاسف مات الطبيب
للاسف مات المعالج
واحنه في غرفة عنايه
ومانركز
ألا لأصوات النحيب
مانركز غوشت العيون
عن الاختيار
شحت الخياله حيل
والسرج شاله الغراب
وراح
طار .......
هيه يعمي
هذا النه
وماسمع حسنه الغراب
وديرة الخرسان
حل بيهه الخراب
والمشاعر
بيد شاعر
بسط بجرحه وقصيده
القصيده
ويمهه أيده
ذكرى اخر انفجار
ذكرى اخر موت
مر بيه القطار
ذكرى اخر ليله
كظاهه (محمد )
وهو يتعبد بغار
((لاتخف ياصاح انه الله معنا ))
والله ماعاف البريه
احنه يمكن عفنه الله
عفنه الله
من غسل الاخلاق
هم جوع الحصار
عفنه الله
من نسينه شلون نصنع ذوالفقار
عفنه الله
من صعد سوك الخضار
وكالو اليعمل عباده
رحت سوك البشر غبشه
شغلة العماله نعمه
وجان جاي الصيف حامي
يسوي واهس تنسى ربك
وتلعن بيوم الصرت
(ولك يابه ولك بويه للدنيه المن خلفتني )
واخ
من بنادم الماعنده دين
اسم دين
اسم سجاده نظيفه
لودعت ربهه يجيبلهه الدعاء
ويعتق ركاب السنين
والحقيقه شكد شواهد
ماعرفناهه شتدين
واسمع استنكار
من اخر ضحيه
عمي خل ندري احنه وين
وثاري حقه
احنه تيهنه
احنه وين ؟؟؟

[ام فيصل]

يامهند

عاشت ايدك على هذه القصيدة التي سطرت الألم والمعاناة
كلمات الهبت السطور تتذمر من الواقع المرير
ومشاعر احرقت القلوب بمعانيها

ولكن رغم ذلك لن ننسى
ان مابعد الضيق الفرج
والفرج القريب بإذن الله

دام لنا مدادك الرائع
وشكرا لك عزيزي

[مريم جبران عودة]

صورة الألم والمعاناة التي يحياها شعبنا


بارك اللهه بكم اخي

ونسال الله الفرج القريب

وتحسن الاحوال


تحيتي لكم

[سلام الدراجي]

كظاهه (محمد )
وهو يتعبد بغار
((لاتخف ياصاح انه الله معنا ))

صدقت وضحت في قصيدتك كل شي انها بحق رائعه دام لنا نبض هذه الاقلام الرائعه وعاشت ايدك