نســــــــينه احزانه
نسينه احزانه وغنـّـينه وياكم - حسبنه احنه الفرح يمشي اعله ممشاكم
نزعنه اثيابنه السوده
نزعنه من الجفن عوده
حملنه الظيم كلـّـه ونتنه ملگاكم - نسينه احزانه وغنينه وياكم
*** *** ***
نسينه احزانه وظلم الطغاة اسنين - حسبنه اچفوفكم تجمع يتامى حسين
وسف زاد الدمع من يومكم للحين - وسف والموت فارش عالوطن جنحين
وطنـّـه اصبح مسارح للرعب والدم
وسف غاب الأمان البي عمر نحلم
سياسيين اهل خرده
نكر واحدهم العـَهده
لمن عاهدنه گال اخدم قضاياكم - نسينه احزانه وغنينه وياكم
*** *** ***
بعد ماننتخبكم لاولانختار - مثلكم ياعبيد الدنيا والدينار
حسبناكم نهر يروي ويطفـّـي النار- حسبناكم نجم للتايه المحتار
توهمنه وحسبناكم تحبونه
اثاري ابليس ماخذ منكم افنونه
بعد مانغلط وننسه
ولاباچر مثل امسه
تلاشى اهلالكم من غيـّـم سماكم - نسينه احزانه وغنينه وياكم
************************************************
شكرا لكم جميعا اكتفي بهذه الابيات والقصيده طويله
الشاعر سعد الياسري