تسأل ليش راسب؟اني اكلك ليش حبيتك واليحب ماينجح

[بيتر بتريلي]

على خشبة مساطب جامعة بغداد
اتعاهدنة وحلفنة وزادنة اتملح



دوخني كلامك ..شمر بيه بعيد
تحبني..مشتريني .. غيري ما يصلح



كضيت اربع سنين بمسرح الاوهام
اجت سنة التخرج حركت المسرح



مو انت الاعرفك.. مدري اعرفك زين؟؟
انت الجنت واضح، مدري صرت اوضح !!



ضاعت لهفتك صفنة بوجه عميان
ما مشتاك يمكن ،، لا على الارجح



لفيت الشهادة وردت بس تروح
اظن وقتك ثمين وكام ما يسمح



ارحم ساعتك ، لتباوعلهة هواي
الوقت كالسيف عدك خاف نتذبح



تسأل ليش راسب ؟ آنه اكلك ليش
حبيتك صدك.. واليحب ما ينجح



وكت الجنت تقرة وتنسأل وتكوم
وتعيد الدرس وتناقش وتشرح



آنه اسأل بروحي شبعد ونلاكيه؟؟
وناقشهة شجاوب لو علي صبّح؟؟



عالصبورة عيني وعقلي كلة وياك
عين بلا دماغ.. شتجمع؟؟ شتطرح؟؟



ولأن كاعد وراي وما اشوفك زين
رضيت لنفسي اصير بخانة الوكّح



متفوق بحبك آنه مو كسلان
خلصت الدوام بوجهك اتصفح



تكتب والشعر يسرح على الوجنات
من باب التضامن انشده واسرح



اكطعلك ورد مثل الطفل واهديك
وعمال الحديقة لسانهم يجرح



غلطو ، واشتكو ، واتعهدت مجبور
كمت اضرب حصص ووياهم اتفلح



اصعد على الشجرة واكتب اسمك فوك
مو شغلة بطر، بس ردتة يتمرجح



طردت من الاحلام هواي ناس عزاز
خليتك لوحدك تسرح وتمرح



انام المغربية بغير درب الليل
و امي تكلي دنية غروب ما يصلح



لا.. يصلح كلت .. خالفت اغلى الناس
جنت غلطان آني وامي رب الصح



ليش،،بطرك ليش انتهت قصتي وياك
وأسف يتبع اسف .. وبأسف يتلقح

الموضوع منقول

[عاشق الكره]

صح السانك عاشت ايدك على هذى الموضوع و الله عجبني مع تحياتي الك (عاشق الكره)

[شوك الشفايف]

الله ياحبيبي تسلم....

هذي القصيدة واقعيه وجميلة
للشاعر الصديق يحيى العلاق..
حبيبي يا رائع..شوك.

[الشاعر محمد الحميداوي]

جميل انتقائك للقصائد واتمنى منك ومن ذوقك الرائع في اختيار القصائد ان تجرب الكتابه تقبل مروري

[بيتر بتريلي]

اشكركم على هذا الرد الرائع
تحياتي لكم

[ايناس الجمال]

الله عليك وعلى ابداعك الشيق رغم النقل

يسلمو استاذ ولاتحرمنا الابداع

[شاكر الهلالي]

قصيده واقع حال رائعه

تحياتي لك اخي العزيز

مميز بانتقائك 0