القصيدة بعنوانها واضحة للقارئ الكريم
أنة همومي جهال وترضع دموع
أكَضي الليل ألولي وما يهيدون
أغفي بهاذ يكَعد ذاك ويلوع
ويفزون أعلة صوتة وما ينامون
الكبر منهم فطمتة وياكل ضلوع
وشسوي شلون لو كلهم يكبرون
جنح بية أنكسر والثاني مخلوع
وطرت كَوة على عناد اليكرهون
بس أسمك نهر والماي مكَطوع
وآنة أعلة الجرف ألهث بالعيون
أون بسكوت موش بصوت مسموع
وأنة جروحي علج والوادم سنون
من عركَة الفرح من كَلبي مشلوع
وشتل حزنة الزمان بنص العيون
عشت زغري بيتم ومكَمط بجوع
ورضعت الضيم من دون اليرضعون
يمرني العيد وآنة بثوب مركَوع
وعيديتي جرح عكس اليعيدون
وتمنيت الوكت لو يرجع رجوع
أنة مسودن وأريدن يرجع الكون
بعدة أخضر عشكَنا وتوة مزروع
وأحو ربعي بمناجلهم يحصدون
يونس زين عمي بحوت مبلوع
أنة بحلكَـ الشماتة الما يرحمون
تحياتي
فارس الليل العراقي