احبن كلشي بيك
ليث الايدامي
أحبن بيك كلشي وكلشي بيك اهواه
واحبن كلشي بــــــيك وحته موزينك
اذا مو زينك احله من العـسل عالروح
بس كلي شحلاته يصير جـــــــا زينك
من اسمع احبك روحــــي مني تذوب
واذوب آنه ويه روحي ابين جفنينك
المـــاي ويه الهوى سر الحيا بالكون
وصـــــــــــارن هالثنين ابين شفتينك
اذن من غير حــبك روحي مني تموت
وكتل النفس تـــــــــدري محرم بدينك
انه من البشر لا ما اغـــــــــــار اعليك
اغار من التراب اللاح رجلـــــــــــــينك
انته ويه الشمس متطابق الاوصــــــاف
بس شنهو الفرق ما بينهه وبيـــــــــنك
الشمس وكت الغروب يروح منهه النور
وانته بليل هندس تضوي خديـــــــــنك
####################
كـَِــنطاري
عريان السيد خلف
* * *
زنجر قفل روحي..
وحاير ابناري
ومن كَـــلبي اعله كـَلبي
انكـَـطعت اخباري
ذِكـَرْتك...
ياعشر تيام تفاحات
عشره ابكل حياتي
وصارن اسراري
جم ليله اعله ليله
ايعز علـّيه النوم
بس حلمك توالي الليل خطـّاري
وتِحْمَر بالعتب وجنات خطـّاري
يالطخة كحل بطوارف القمصان
من كل ما كـَضيته..
وياك تذكاري
ياوردة بنفسج
والكـَمر نعسان
وعيونك كـَمر..
للصبح كـَمـّاري
يارفـّة نبض ..
هنيال من حّباك
وندَ كـَلك نذر ..
للصوت..
للطاري..
للبسمه التشع بالروح..
شمس سطوح
وتِــتــْـناثر شعر..
ماتوصله اشعاري
لعيونك..
عيونك حيـِرتي ابدنياي
جلـّت من حَـوَرهـِن
قدرة الباري..
وتكـَلـّي:- اتغيرت!
شو مو رسومك ذيج؟
تحجيها ابعفه!
ومن ضيمك غياري
تمنـّيتك تجيني..
وتنجوي ابناري
وكـَـبالي واكـَعدك ..
عاشكَ ومعشوكَ
واحجيلك ابحالي اشصار وشجاري
واكاسرلك حناني
ابطعم خمرة دير
وِتـْـسَكـْر الزمن وتلاعب اوتاري
وغنـّيلك .. غنــه
بهداي... بهداي
اعله خيـبـتـنـّه
وسـُفنـّه الراحت
ويه الروج حداٌري
وازعلك.. لذ ّتك..
بالعشكَ من تغتاض
وتكـَطـّر شفافك ..
عسل كـَـنطاري
وارضّيك ابْـ ولـَـك
يابعد هاي وهاي
واتعذر سنه...
وماتقبل اعذاري
واحبك من صدكَ
من حب اهلنه الراح
مو حُبْ هالوَكِت
والشوكَ طيـٌــاري
مما راق لي