كلبي الما هوه غيرك هواكم

[الامير العراقي]

نثرت دموعي للاسمر والاكحل
وصبغ وجناتي على خدودي ولك حل
صدكني سهل انت ولك حل
احلك لو ترد انت علية


على ضيم الهوى ياروح علمي
وبيها ارفعت اني اليوم علمي
اسالتها المستوى وتكول علمي
بخامس باء يالتسال عليه


قلبي انت ملكته وانت حر بيه
عليل وطبي عندك وانت حر بيه
كاس السم اشربه وانتحر بيه
اذا غيرك يمس اطراف ادية


باب الدار بجفوفي لحني
وحنين النوك ما يوصل لحني
وطيت لكن اسهمك لحني
بوسط قلبي وطبيبي احتار بية


هلي وياهم چنت عايش بلاهم
ونهاري شماضوى مظلم بلاهم
هلي مدري الوكت شنهو بلاهم
ولاهم اعرفوا بالصار بيه



حبيبي لا تظن انساك ولهه
دوه الروحي غرامك صار ولهة
الشفة والعين ترد عليك ولها
تدعيلك كل صباح وكل مسية


الك ياصاح ماظل مني خاطر
واحسبه احساب دربك من اخاطر
تعال كرب حبيبي مني خاطر
تعرف اجنون حبك اسوه بيه


انا بگاروك حبك وانته هزني
صرت فرصه بحياتك وانتهزني
انه شجره محبتك وانته هزني
وخلي الورد يتناثر عليه


عيونك تصيب الگلب بسهام
يلي ابد ماشفت بهواك بسهام
انا طير المهاجر بالفضاء بسهام
اشوفك وانا تايه بالبريه



يـحلو الاطبـاع واصلني وقارب
ماعندي اهل غيرك وقـارب
سفينه بالبـحر ردتك وقـارب
تشيل الحمل من يثگل عليـــه



عجيبه الوكت يفتر ويانه
وغير الحزن ماعدنه ويانه
خلاني الوكت انه احجي وي انه
وتصيح الناس امسودن عليه
***********
كل ساعه الجرح ينزف وشده
وكل ساعه انطيح بمحنه وشده
يحجيلي عالورق هوه وشده
وهو الجان امس خادم اليه
***********
وكتنه لا شمس هوه ولافي
ورحمه ابد ماعنده ولافي
يمي اشعجب جاي انته ولافي
وبس بشغلتك تلفي انته اليه
***********
حوسم مدري فرهد مدري ماله
ثابت مدري واكف مدري ماله
بلاني الوكت بلوه مدري ماله
وعلي اهموم يمطر كل مسيه
***********
كلبي الما هوه غيرك هواكم
حبيبي اشكد حلو طعمه هواكم
احس الكلب يتنفس هواكم
اذا اتروحون كلبي ايموت بيه
***********
مخنوك ارد اشمك ياهوانه
وذله انعيش باغيابك ياهوانه
من اشوفك انسه اسمي ياهوانه
وانسه الروح اذا تلزم اديه
***********
حبيبي العلي لا خابر ولادك
ولامره وصل بابي ولادك
بغيابك كلبي ضل واكف ولادك
ويضل يرجف اذا مريت اليه
***********
ليش احنه النحبهم ما يحبنه
وحلو صدك وصافي ماي حبنه
احضننه وحبه ومايحبنه
وحبيبي البوسه يبخلهه عليه
***********
لجلك العمر كله هونته
شلون انعيش باغيابك هوه انته
للغيره والكرم منبع هوه انته
العراق وللعرب تبقى الهويه
***********
عراقين طحنه بس علينه
وبهمه يذب الوكت بس علينه
طاحت كلهه واكف بس علينه
ويضل تجايه النه بكل مسيه
************
وكتنه عالصبر والهم علمنه
واحنه العلم للدنيا علمنه
عالي وابد ماينزل علمنه
ويضل اول علم فوك الوطيه
************
انه الما دورت شهره ولامال
ومعاف الصبر كلبي ولامل
بعلو النجم راسي ولامال
عراقي الدنيا الويهه بديه
************


منـــــــــــــقول

[امير الاحزان:]

باقة من الابوذيات الرائعة
اتحفتنا بها اخي الامير
دوم التواصل
ربي لايحرمنا منك
اخوك الامير

[الامير العراقي]

مشكور اخوي امير على الرد الجميل
بارك الله بيك يالغالي
تحياتي الك

[ام فيصل]

عاشت ايدك ياالأمير
ابويذات رائعة
شكرا لك ولهذا التميز والعطاء الدائم
دام لنا ابداعك
مع تحياتي لك

[الامير العراقي]

مشكوره ام فيصل الغاليه على الرد الجميل
منوره الموضوع
دمتي بخير

[شاعر الرومانسيه]

الله الله الله
روعه يا الامير العراقي
بوركت اخي العزيز على هذا النقل الجميل لهذه الباقه الحلوه من الابوذيات الرائعه كرعة ناقلها






تحياتي لك















شاعر الرومانسيه

[الامير العراقي]

حبيبي الغالي هذا من ذوقك الراقي
شكرا على المرور الجميل
منور