مع تحياتي وتقديري للشاعر المتألق
(سمير صبيح)
عنوان القصيدة
(شدينة الجرح )
............
شدينة الجرح وانگطع حبل الخوف
وكحلنا الجفن وانسدت العبرة
بعد ما ننطي لزمة ..نظل ملح بالماي
ميزنة الحروف و وضحت الجفرة
ما نغلط بعد ونصير مثل الخيط
تحطنة على الجرح وتعوفنة الابرة
عود احنة ويبس ما نصير ماشة نار
مو بينا الحفر ولغيرنه المجرة
تجوينا نعم..نگطع هواها تموت
كافي تضل عمر بجفوفنة الجمرة!
وحلمنا الليل يُصلب والخمر..والطير
والف يوسف اجانة ومحد يفسرة
ما نعرف مشينة وياهم مغمضين
دفعونا و وگعنا وغطو الحفرة
والجفة طوّل مدها وطلع وارتاح
وابو النفس العزيزة ليهسة بالنكرة
رضيت اصبح جسر بس ردت اشوف الماي
يجري گبال عيني وما ردت گطرة
خذت صوتي أمس توعدني بالتفاح
وصلت لمنصبك تحجيلي عالخضرة!؟
نفس الفائدة الموجودة بالتفاح
بس هاي بحمار وهاي لا خضرة
كافي تضم عليّ ..اعرف شنو اللي يصير
سيل الدم اعرفة وياهو اليفجرة
وانا الميت اعرفة واعرف الدفان
شوكت ما اريد اروح واوصل لگبرة
وكافي من العتب ونلومها من تطيح
على الفاسة شبديها ونحجي عالشجرة؟
ولا ذنب النهر لو عكس مجرى الماي
الگاع تصير رخوة وتعكس المجرة
وخد الينسطر شيفيدة تبچي العين
شما صبت دمع ماتمسح السطرة
اليحفر گصتة بفاس الصبر يرتاح
بعد فنهة تطيح وتوگع الگطرة
وبية شگد عتب ..وشگد ملامة وحيف
على الدمع البچيتة وما طفت حسرة
على الرَدلي يتبختر لا فرس لا سيف
ويحچي بكل رهاوة وطعنتة بظهرة
على اليوگع فريسة شلون يغفة الليل
ينام بيا وجه وذياب التنظرة
مثل شذرة الكرامة ومحبس الانسان
وبيها شكد محابس ذبت الشذرة
وبيها شكد محابس ذبت الشذرة
.............................
ارجوا ان تنال اعجابكم
مع التقدير