السلام عليكم ورحمة الله وبركاتة
كان يا ماكان رجل تاجر زنكين حيل وكان اله زوجه واولاد وعايشين بمد الله وشائت الاقدار
ان تغرك كل السفن مالت التاجر بالبحروالرجال انتكس وميدري شيسوي بحيث ماظل عنده
بس مصرف للاهل انطاه لزوجته وراح لبغداد وصل لبغداد وهو مايعرف احد بيهه فسكن
باحد الجوامع يصلي ويصوم وحالته حاله تبجي الصخروالناس بهذا الجامع يروحون و
يدخلون ايباعون عليه ويحجون منو هذا الكاعد لوحده وليش معتزل بروحه ومرت ايام
وشهور عله هاي الحاله وبيوم من الايام اجه عليه الامام مالت الجامع وكله ابني
شبيك دومك مهموم ولوحدك احجيلي بويه اصايرلك وكعد ينحب ويبجي وبهل الاثناء
دخلو الجندرمه مالت الوالي ودخل الوالي والناس التمت عليه والوالي ايوزع بالعطاات
ومملحك وامام الجامع شاف صاحبنه ماكام وكان يوم الجمعه وراح الوالي وامام الجامع
كله ليش ماكمت للوالي واخذت مثل مالناس اخذت رد عليه صاحبنه وكاله انه روحي عزيزه
وكله اي بس انته اشوفك محتاج اليوم ما اعيفك اذا ماحجيتلي سالفتك وحجاله التاجر على
مصيبته وكله انه هسه مشتاق للعايله وفراكهم اذاني وماعندي مصرف واجه العيد والناس
كامت تشتري ملابس العيد وانه كلشي ماعندي رد عليه الامام وكله تروح للوالي وهو يحل
قظيتك ولا تتردد ترى الوالي كلبه طيب هذا من ثاني يوم صلى الظهر وتوكل على الله وراح
للوالي و دخل على الوالي وسولفله السالفه بما انزلت الوالي حزن عليه اهواي واشفق عليه
كله هاك هاي ثمن اهدوم الك والجهالك ولااتروح ايدك خاليه وهاي ثمن سفرتك
والله ومحمد وعلي وياك الرجال ماصدك من فرحته اخذ ملابس اله ولمرته ولجهاله كلهم
وراح يم الشط حتى ايحمل بالسفينه ويسافروصدفه وهو دايحسب شكد بقى من الفلوس
شافته مره ملعبه من اهل بغداد والشرار يطفر من عيونهه وصلت يمه وكامت تصيح
ياناس الحكولي وينكم يااهل الرحم هذا الرجال باك افلوسي وانه مره فقيره وعندي ولد
الناس التمت عليهم وصاحبنه ايصيح ويشتغيث والله مااعرفهه ولا عمري شايفهه
ويكللهه يمعوده خافي ربج ترى ماعندي غيرهن الناس كامت تسالهه شيكربلج
كالت رجلي كالو وشبيه وياج كالت مطلكني وعندي ولد وهذا ابنه ومايدفعلنه
وموتنه من الجوع وذاك ايشيل روحه ويركعهه ولج والله ماعرفج ليش هيج تحجين
الناس كلولهه روحي للوالي انتي وياه وهو ياخذلج حقج من عنده اخذوهم للوالي
ودخلو عليه الوالي استغرب لان هذا الرجال يعني صاحبنه يعرفه شرجعه وحجه
للوالي كلشي الوالي كل للمره وانتي شتردين من عنده كالت لوياخذ ابنه لو ينطيني الفلوس
الوالي يعرف كلشي من الاول سكت حك لحيته وكللهه زين خوش انته اخذ الولد وروح
الرجال عرف بلعبة الوالي المره اعيونهه صارت بالطول كالت للوالي والينه اريد احجي
ويه رجلي على صفحه كلهه روحي المره وكعت على ايد الرجال ورجله اتبوسهه يمعود
ابني ماعندي غيره لاتفطر كلبي بيه كلهه ليش سويتي هجي وياي الا اشلع كلبج مثل ما
سويتي وياي وتتوسل بيه الى ان عفى عنهه والوالي كلهه امشي وخافي الله واخذي ابنج
الرجال ماصدك على الله حتى ايلحك المركب ويروح لهله وصل يم الشاطي ولكه السفينه
محمله ورايحه سئل الناس شوكت السفينه الجايه كلوله باجر من الغبشه كال صاحبنه
خل اودي افلوسي عد واحد يخاف الله لايجي واحد ويبوك افلوسي وراح الفد رجال متقي
حييييييييييييييييل وايخاف الله والسبحه ماتوكع من ايده دخل صاحبنه عليه وكله شيخنه
قاصدك بخدمه كله الشيخ اامرني بخدمتك وليدي كله عندي مبلغ واريد اظمه يمك وانته
ايبين عليك ادمي واخاف من ولد الحرام ايبوكون افلوسي وباجر الصبح امر وآخذهن
واسافر لهلي كله وعدعيناك غالي والطلب رخيص روح محصن باسم الله الرجال راح
للجامع اينام الى ان يصبح الصبح وصار الصبح وصلى وطلع ينشد على افلوسه واجه
للشيخ وكله هاشيخنه انطيني فلوسي كله الشيخ يافلوس؟؟؟؟؟؟؟؟ منتديات الفرات
كله شيخنه شنو نسيتني اني ابو الفلوس مالت البارحه رد الشيخ اني عمري ماشايفك
يافلوس امشي اطلع بره لا اوديك للوالي كله صاحبنه وهو مغلوب على امره لا توديني
ولا اوديك شيكول عليه الوالي بعد اظاهر الدهر مايريدني اشوف اهلي وخله ورجع للجامع
تعبان وحزين وحاير بامره اكثر من الاول شافه الامام كله ها شو اهنا ليش انته مارحت
لهلك كله عمي انه حظي اغبروهاي سالفتي كله اشوداك عله هذا الشيخ هذا واحد ميخاف
الله امشي اوديك عللي يخلص افلوسك منه وراحوا لفد مره وحجولهه على كلشي وكالت
اسهل منهه ماكو وراح افهمك شتسوي شربوا الجاي وبعد ساعه تروح للشيخ وطالب بفلوسك
وراحت المره للشيخ وطبت عليه وبيدهه صندوك كبير وكلتله شيخنه عندي امانه واريد
اامنهه يمك واني رايحه للحج ادور على رجلي لان بطى علينه واخاف صارله شي
وفتحت الصندوك واذا بيه مليان ذهب الشيخ كام يبلعم وتخبل من شاف الفلوس وبهل
الاثناء دخل صاحبنه وكله ها شيخنه وين الفلوس الشيخ رد عليه وبدون مايباوعله
هاك الفلوس وتروح اتشوف اهلك بالف سلامه وبهل الاثناء دخلت بنت المره وتصيح
يمه يمه ابشرج ابويه رجع من الحج والمره تصيح يارحمة الله الواسعه رجع ابوج خوش
ياله شيخنه رجعلي الصندوك لفت غراظهه وهيه اتباوع على صاحبنه وتتبسم
الشيخ وكانه عرف السالفه مدبره وظحك وكال
فنج يامره ركصني




اللهم صلي وبارك على سيد من خلقت من رسلك وانبيائك محمد واله الطيبين الطاهرين
اختكم ريما الحافظ اتمنى ان تنال اعجابكم واتحفونا بردودكم الجميله