بسم الله الرحمان الرحيم
السلام عليكم ورحمة الله وبركاته
اخواني واخواتي الي بالحكومه العراقيه
هاي الرساله الكم بالذات
انتوا تكَولون ان السعوديه وسوريا وفلول صدام والقاعده الها ايد بيها
وتكَولون هما الي فجروا الانفجارات في العراق ....
واحنا انكوللكم هذا عذر اقبح من ذنب !!
وسؤالنا الوحيد من قبل جميع الشعب العراقي هو:
وين الجهاز الامني العراقي المتين الذي لايخترق حسب كلام المالكي
وينه كَولونا بس وينه ؟؟؟؟؟
ليكون قصد المالكي جهاز الامني لمنطقة الخضراء الي تحميكم
وتحمي عوائلكم واولادكم ومصالحكم ؟؟؟؟؟؟؟؟؟
نصيحتي للحكومه العراقيه
ولوجه الله هو ان تستقيلون من مناصبكم
لانكم غير قادرين على حماية الشعب العراقي وغير قادرين على اعطاء حقوقهم
ولا قادرين على تلبية خدماتهم المعيشيه الي لحد الان
يفتقر الشعب العراقي صاحب الحضارات والامجاد والعلوم
الى ابسط شي وهو الماي والكهرباء والامان
والله رجعتونا الى الالاف السنيين
العالم يتقدم ويتطور وماشي ويه عصر السرعه
وانتوا يوم ورا يوم ترجعون العراق الى العصر الحجري
والله احنا تعبنا تعبنا تعبنا يزي عاد انتم متعبتم من هالوضع
و الي ايصير بالعراق لو عاجبكم الي كاعد ايصير بالشعب
وراضين عليه وعلى نفسكم وساكتين,, وين الذمه والغيره !!
يالحكومه احنا منريد نخسر اكثر شهداء وضحايا
وتحترق كَلوبنا كل يوم ومندري شيصير بينا
والله شكو علل بالدنيا راح اتصير بينا من وراءكم
تعوفنا الله يرحمكم ويرحم موتانا...
فأتمنى من كل شريف وغيور منكم على بلده أن يقف وقفه حاسمه
وان يستقيل من منصبه ويتبرء من العملاء والخونه ويترك مصالحه شويه
ويشوف على العراق اشكاعد ايصير بيه
حتى اتبينون النا نوايايكم الحسنه وحبكم لشعبكم وطنكم
لان كافي هدر دماء وقتل وتشريد وتهجير كل يوم بسببكم
وانتوا ولا انتوا تكَول اذن من طين واذن من عجين
والله لو دكينا على الحديد جان رن
بس انتم ابد متحسون الي كاعد يصير بالعراق
لانكم منطين الاذن الطرشه وهذا الكلام ميصرفكم
لان همكم الوحيد هو فلوس العراق ومصالحكم
ومال العراق والشعب حرام بجلدكم
اذا متخافون على انفسكم من غضب الله
على اقل خافوا على اولادكم واحفادكم
لان ياكلون من مال الشعب العراقي الجريح
وغضب الله شديد محد يكَدر يحمله
وترا الشعب بشر والله بشر ابيش نحلفكم حتى اتصدكون
مو بس انتم بشر حسوا عاد مو تعبنا منكم ومن ايديكم واعمالكم
والله لو انتوا مسوين شي للعراق جان منقهرنا منكم
بس الحق ينكَال ,حتى لو جانت الحقيقه مره عليكم
انتوا ما منكم فايده والي مالا خير لاهله وبلده مالا خير لنفسه.
وانتوا وضميركم حسبوها زين
وشوفوا افلام ضيم وخراب ودمار العراق زين
بلكت اتحسون وتراجعون قراراتكم من جديد
لان الشبعان ميحس بالجوعان
فروحوا شوفوا ضيم العراقين بعينكم المجرده مو من بعيد
من منطقة الخضره او من دوله ثانيه
قبل ربك مياخذ امانتكم من الدنيا
حتى اتلحكون اتوبون وترجعون لضميركم الحي
وتحسون بالشعب العراقي المسكين الي صابر ومتحمل
والله لو رمينا همومنا على الجبال جان متحملته وانفجرت.
صبرنا صار ازيد من صبر ايوب عليه السلام
وساكتين وحاطيين ادينا على الجرح بلكت يوكف نزيفه.
اللهم احفظ العراق وشعبه امين يارب العالمين
بقلم :قرة العين
التي تنزف الدموع والجراح كل يوم على العراق وشعبه المظلوم.
بسم الله الذي لآيضر مع أسمه شيء في الأرض ولآ في السمآء وهو السميع العليم , احفظ العراق من كل مكروه انك سميع مجيب الدعوات.