عابس يصيح بصوت ... يامن تسمعوني ,,,
جنني حب حسين ... لا لا تلموني
-------------------------------
عابس برز والموت يتخطة جدامة
يدري النهاية اليوم وانـختمت ايامة
تنثر جمر عيناه وبجفة سنصامة
وينادي هاي الكوم اخضع يريدوني
لا والذي عالكاع رافع سماواته
هذة الحشد هيهات ترهبني صولاته
راعي الهدف دنياه ما دنست ذاته
وانه على طيب الذات اسلافي ربوني
-------------------------------
عابس يصيح بصوت ... يامن تسمعوني
جنني حب حسين ... لا لا تلموني
-------------------------------
درعي انخلع السيف من جفي ذبيتة
وهالعسكر الجرار اعزل تعنيتة
شابجة ايدي بايد وبعزمي لاويتة
عابس انة وهالكوم كلهم يعرفوني
لن واحد من الناس بالطف وقف حاير
ينشدني جن مذهول ياعابس شصاير
اعزل رحت للجيش وعلىالجمع غاير
هذة انت جن مجنون تتمثلة عيوني
-------------------------------
عابس يصيح بصوت ... يامن تسمعوني
جنني حب حسين ... لا لا تلموني
-------------------------------
جاوبتة ذوك جواب يالناشدت عني
لوشاهدت هالحال لاتعتجب مني
طحت بغرام حسين وبـحبة جنني
حيث الجنون فنون والمعركة فنوني
خل يسمع ابن زياد وجيوشة خل تسمع
ماعوف ابو السجاد لو جسمي يتكطع
والدنية بين اثنين لو عزة لو مصرع
جيتلكم بلا سيف كلكم تشوفوني
-------------------------------
عابس يصيح بصوت ... يامن تسمعوني
جنني حب حسين ... لا لا تلموني
-------------------------------
خل كل دماية تسيل خل يطفح الوداي
ولا محجمة من دموم ريحانة الهادي
ساعة ممات اليوم احسبهة ميلادي
وبموتي هالاجيال عايش يحسبوني
راعي الأبة بدنياه لو وذرو جسمة
صفحة خلوده وياه يكتبهة عن دمة
بس الذليل يموت كبل الممات اسمة
وانة الأبي وهيهات عالذل يرغموني
-------------------------------
عابس يصيح بصوت ... يامن تسمعوني
جنني حب حسين ... لا لا تلموني
-------------------------------
هاج وغضب عالموت والعسكر يشوفة
مابيدة جان سلاح حاربهة بـجفوفة
زلزل لوه الجيش وارتـجت الكوفة
ويصيح انة الماهاب من موتي تدروني
سهام وحجر يرميهة العسكر الغاضب
واثبت اسد غضبان عابس وقف واثب
يشكَف حجر ورماح وبهمّتي يخاطب
اتمنة لو افراد كلكم تكصدوني
-------------------------------
عابس يصيح بصوت ... يامن تسمعوني
جنني حب حسين ... لا لا تلموني
-------------------------------
بالصيحة عابس جان من هل الجمع رايد
للمعركة يبرزون واحد بعد واحد
لجن لفاه الجيش من كل كتر حاشد
وعابس وثب ويصيح ماخابت ظنوني
كثرة المرام وصار يشكَفهن بصدرة
وتوريدوه الكوم طبرة بأثر طبرة
عابس وكع جالطود وتوسد الغبرة
وبالدم كتب عالكاع هذة انه مضموني
-------------------------------
عابس يصيح بصوت ... يامن تسمعوني
جنني حب حسين ... لا لا تلموني
-------------------------------
بالحومة لن حسين يم الجسد جالس
يصرخ يـمن بالكون تنعت بالف فارس
فكدك جمر بـحاشي ظل يدوي ياعابس
وانه ادري بين عداي مفرد تـخلوني
منقـــول
ونســـألكم الدعاء
رد مع اقتباس
