عمر الفلسطيني 00 وحسين العراقي 00 بقلم عبد القادر الزيناتي
اسكت اسكت
لاتقلي انت منو ومنين
ولا تحجي اعرفك انه 00 كلش زين
شنو اسمك 00 شنو اصلك
ومن يا عشيرة ومنين
مو جنه سوه 00 والعبنا سوه
وما سالتني ليش اسمي عمر
ولا سالتك ليش اسمك حسين
لان نعرف احنا اصلنا شنو
ومن يا امه ومن يا دين
ولا سالت شاحمل هوية
من الخليج 00 لو مغربي 00 لو من فلسطين
ولا امك عيرت امي
ولا قالت 00 ليش جيتوا هين
من الزغر واكبرنا سويه
والزمن خلانا واحد شمال 00 وللاخر يمين
وبعد الاحداث
التقينه بسيطرة
ضابطها انت 00 والجنود وياك ملثمين
وعيوني 00 ضوت بعيونك
شفت بيها 00 ايام الطفولة
من جنه جيران من اسنين
وشفت بيها كره وحقد للمامشوا وياك زين
واتذكرت خبز الوالدة
من تلزم الشنكة بيديهاوتطبطبها عل الطحين
واتذكرت 00 احلى تشريب بلحم
ووراه الجاي 00 مخدر وسنكين
وامي الحبية 00
فلافل 00 لفة تسويلك 00 ولحم بعجين
اسكت 00 اسكت اعرفك كلش زين
عيونك هواي تسال
والوقت 00 اعلي ثمين
وبثواني 00 كلها حصلت
اتذكرت اسمي يا حسين ؟؟!!
اني عمر
عمر ال بالزغر وياك واحد
وبالكبر صرنه اثنين
عمر يا حسين
لا تستغرب
ال جاكم من حيفا من فلسطين
عمر ال عاش 00 عمره وياكم
وما نسه حبكم 00 والحنين
عمر ال ما باع الوطن
ولا خلف بارضك 00 خراب وطين
يا حسين اعرفتني
ما ظل وكت 00 لا تخليهم حولي ملتفين
يا حسين
جنت بشاربي بالطفولة
واليوم بشاربك 00 انه والدهر يومين
بسرعة افطن 00 بسرعة تذكر
ولا تضيع الزين بالشين
عيونه لمعت 00
يمكن تفطن
يمكن تذكر 00 نفس الجرح اثنيناتنه مجروحين
صاح00
انزل ولك
انزل بسرعة
وايديك ليفوك
ارفعهن عاليات !!
خليني اشبقك بحظني بشوق وحنين
اني حسين ياعمر 00
وما نسيت ايامنا ولا عشرة سنين
اني حسين 00 واصلي عربي
ودمي 00 ما اختلط بشين الشرايين
اني حسين يا عمر 00 بس الوكت
خلاني بثواني انسه ما اتذكر
اني ما نسيت الكعدة والكومة
وايام الدراسة والمعلم بيه و بيك يفخر
ولا نسيت براس العقد تتذكر
من كنا نلعب دعابل وي قادر ومزهر
وانت 00 من ازاغل باللعب
توقف وابديك تدفعهم
وانه ابرجليه ادفر
ولو غلبنه
نهيج المنطقة 00 والناس تقول شكو 00 شكو
نقول 00 اغلبنه مزهر ال باللعب ما كان يخسر
اشبقني بحرارة خوية عمر
اشبقني 00 ولا تبعد عني اكثر
جنت اسال 00
يمكن سافر 00 يمكن رجع الفلسطين
اتذكرت 00 فلسطين ما رجعت ؟؟!!
يمكن مات 00 يمكن عايش اهنا بس وين
وبالاحداث الاخيرة اشصار بيه !!؟؟
والجنود تستمع 00 شنو هالحكي الثخين
من كان يقول المذهب اساسي
لو عشت وياه مو عمر 00 عمرين
لو انت شيعي 00 انت سني
ومن يا صوب 00 من الصوبين
امريكي 00 يباوع علينه بتك عين
وال وياه 00 همس 00 وباوع بالاثنين
واني اشبك بيدي واحظن
ودمعي يجري 00 سايل على الخدين
وهو بدموعه 00 غرق قميصي
من الجتاف 00 حد الردانين
وبعده الامريكي 00 بنظرة حقد
مو بعينه احنه 00 واحنه متشا بكين
يكره اخوة تصير 00 بين اثنين
هذا عراقي عربي 00
وهذا عدوا اخوته الاسرائليين
ثار وغضب 00 اوثارت البارودة بيده
وواثنينه برصاصه 00 مجروحين
واني وحسين وقعنا وبدمنه غرقانين
ودمي ودمي 00 نهر واحد جره
مو نهرين
وابتسم 00 وكلي اضحك هم غلبانهم
وما فرقوا الاسمين
اسمك عمر باقي عل الفاروق
وانه اسمي على اسم الامام الحسين
اني عشت 00 ومن الله الي عمر
وحسين الشهيد باقي ويملك اثر
والامريكي 00 نيشان علق على الصدر
مو اده مهمته 00 وفرقنا الاثنين
الزيناتي
رد مع اقتباس
رد: عمر الفلسطيني 00 وحسين العراقي 00 بقلم عبد القادر الزيناتي
