لحدمن ياوطن

لحدمن يا وطن

لحدمن يا وطن نايم على الغيض وانت الغيض ما نام بثنيتك

اسمك صبح ما بين الوفيات وحكام العصر باكو هويتك

عدمن تشتكي وكلها تماثيل يا تمثال يهتم بقضيتك

شكم حاكم اجاك وشبعك موت ظل ياهو اليجي يطب بخطيتك

حاير يا وطن متكلي يشبيك من يوم الصرت حاير لكيتك

ليش بكل وكت مذبوحه هل الناس وعلى موت الغصب فاتح شهيتك

تمنيتك تفز من نومتك هاي وتشوف شلون حالك ...تمنيتك

الاف الجناسي ستوطنت بيك غافي لحدمن اظل بغفيتك

اصحه يا وطن تاريخك انباك ناطورك الباكه منهل بيتك

كلي يطيب جرحك يا وطن بيش وعزرائيل هل نام بريتك

اعرفك ما تعرف الخوف فد يوم ومعروف انته بالشدات صيتك

يا ديره شرف يا هيبه الكون الدنيا تصيح بالشده بحميتك

يا دله ومظيف وعالي الشان وبلطيبات ما تبخل لكيتك

نسيت الاهل بالغربه والاحباب صدك يا وطن بس ما نسيتك

شتهيتك موت وادري الموت مكروا بس ما صح بديه انه ولكيتك

وعشكتك يا وطن عشك المجانين وعلى دم الظحايه انه هويتك

حاير ياوطن متكلي شبيك من يوم الصرت حاير لكيتك

تخير يا وطن وثنين الك تختار

لو طاغي اليحكمك لو الاستعمار

تخير يا وطن واثنين الك تختار

لو تنباع جمله لو حكم جبار

عليك الطاح بالطف يا وطن تصرخ لحدمن ساكت ومحتار

عليك الكطعوا اجفوفه عليك بشيمه الكرار

عليك بداعه الزهره وضلعها ولوعه البسمار

مشهوداتلك يا موطن الثورات لاتنسى الحسين شلون لمن ثار

بشر واحد رفض ما صافح الطغيان ولا هزه يزيد وجيشه الجرار

علمنه الحسين التظحيات اشلون اشلون انموت بالعز موته الاحرار

نذر روحه برمح من زاحماه الغيض وناده الموت اولا من ركوب العار

وناده الموت اولا من ركوب العار

تخير يا وطن واثنين الك تختار

السويد

[الحالمه]

يا سلام عليك اخي الكريم
قصيدة جدا رائعة , وكلمات مؤثرة
عاشت ايدك وحياك الله بمنتدانا و مية هلا بيك

[رونق الحياة]

قصيدة رائعة

مشكور اخي

[عراقي أصيل]

اسمك صبح ما بين الوفيات وحكام العصر باكو هويتك
عدمن تشتكي وكلها تماثيل يا تمثال يهتم بقضيتك
شكم حاكم اجاك وشبعك موت ظل ياهو اليجي يطب بخطيتك
حاير يا وطن متكلي يشبيك من يوم الصرت حاير لكيتك

صح لسانك أخي عازف الليل قصيدة فعلاً رائعة
تعبر عن واقع ملموس
شكراً لكَ أخي الكريم
بأنتظار الجديد

تحياتي

فارس الليل العراقي

[رفيع التهذيب]

كلمات تحفر القلب
سلمت اناملك اخوي عازف الليل
تقبل مروري

اشكركم على مشاعركم
اخوتي وهذي هي مشاعر العراقيين النبلاء
شكرا لكل من كتب وكل من مر بهذه القصيده
وقرائها الف تحيه لكل من الحـــــــــــالمـــــــــه و رونـــــــــــــــــــــــــــــــق الحـــــــيـــــــــــــــــاه
و
فـــــــــــارس اللــــــــــيـــــــــل و رفــــــــــيـــــــــــع الــــــــــتـــــــــــهذيــــــــــب
شكرا لكم

[ارشيف الفرات]

لاتعليق فاللسان عجز وراح ينشل

اشكركم على مداخلاتكم مع تحياتي للجميع