ادك على راسي .. دك عيني دك بقلم عبد القادر الزيناتي

[عبد القادر الزيناتي]

دك عيني دك
ادك على راسي وانفجر
لو بقلاص مي وانتحر
لو اخبار ما اسمع وانقهر
لو اشوف تلفزيون وانبهر
دك عيني دك
دك عيني واهزلك جتف
وبنص الكعدة ارجف رجف
لا نجوى بهزها اشوف واعترف
ولا ملايين برقص خنجر تنشهر
دك عيني دك
دك واني اهزلك خصر
وارقص الجوبي براس الجسر
امن وامان بس انفقد!!!
والرئاسة تختل بالقصر؟
دك عيني دك
دك والنفط بالبلد مفقود
تطبك سره وفارغ انت تعود
النفط بس لسعد ومنى وسعود
وانت الك موت واحلى قبر
دك عيني دك
دك عيني دك ماكوا انفجار
ولا تدخل فارسي ولا اعتداءجار
ولا امريكي بطلعته من يمنه محتار
ولا سنون تظهروسم يقطر قطر
دك عيني دك
ادك ايد فوك.. وايد جوه
واقول اليخلصني.. وين هو
شوف الاعجمي بالوطن اشسوه
وكل سطرة بلعلبه تسطر سطر(الرقبة من الخلف)
دك عيني دك
انه بالدنبك ادك وانت ضرب دف
وشوفلنه راقوص يلف الوسط لف
عل الوحدة ادكله لهذا المهتلف
وانت بالجمباراتتهدر هدر
دك عيني دك
على راسي ادك وضيمي اشكيلك
وانت سولفلي اتشيلني واني اشيلك
صرنه بقيطعه لا تجيني ولا اجيلك
نشتهي العنبة ونحلم بكوشر تمر
دك عيني دك
دك ياما دكوا كبلنا باب وابواب
بوسط العرس دكلها مظفر النواب
ايام المزبن قضن وجتنه ايام العذاب
لف ما شربنه ونصنه باقفاص الاسر
دك عيني دك
دك دكة حزن بالدف والجمبار
محد سال عنك لا صديق ولا جوار
كلها تريد ارضك نفط العالم بيها صار
شرق وجنوب البوك وامريكيا تحدد سعر
دك عيني دك
الزيناتي

[ذيب الغزالية]

عاشوووووووووووووووووووووو

شنو هذا الابداع يا مبدك

والله كلمات حلوة واتخرب ضحك بنفس الوكت

تقبل تحيااتي أخويه الغالي

[عبد القادر الزيناتي]

شكرا ايها الذيب نورت
وشكرا لكلماتك الطيبة وانتظر المزيد
الزيناتي

[سلام الدراجي]

تسلم ياعبد القادر على هذا الشعر الرائع خليت الدوه فوك الجرح الله يبارك فيك ويخليك

هههه دك عيني دك.
حلوه.
شكرا

[عبد القادر الزيناتي]

شكرا اخي الزي لمرورك وكلماتك الرقيقة
والى تواصل دائم
الزيناتي

[عبد القادر الزيناتي]

الاخت العراقية تحياتي
شكرا لك ولعطر عطرت صفحتي به
الزيناتي

والله نشكرك على هذا الشعر الجميل بس ديربالك على راسك من الدك ونريد منك المزيد من الشعر الجميل اخوك ابن الرمادي