كلمات وتعابير بسيطة ولكنها تحمل الكثير من ما يجول بقلب كل عراقي ان كان بالداخل او بالخارج احببت ان انقلها لكم ويمكن سر جمالها ورونق معانيها هي بساطتها التي تجعلها قريبة الى القلب اكثر من قربها الى الوزن والقافية
نسم علينه ..البـــــــــــجي
اشتم رياح الدمع واختنك من الحزن..
خلصنه كل العمر
نمسح دموع الجفن
مابقت عندي ثقه لاباليروح ويرد
بالوطن حته الورد
بالعطر حمل جذب
حته الورد مايحن
من عنده لاتقترب
(باي لحظه هم ينفجر)
ونموت بأرخص سعر
نندفن مره بحجر
(ومرات مانندفن)
وفيروز من الصبح ياخذنه الهه الطرب
بس نسمع بغير اذن
(نسم علينه البجي من بجت بغدادي
يا حزن دخل الحزن بس فارك بلادي
اخواني ماتو غدر .. وانذبحو اولادي)
فيروز ماضل صبح..
الصبح عاف الوطن
بالشمس ماضل ضوه
اخذوهه للمعتقل
(زينو ضواهه صفر)
وذبو شمسنه بسجن
كاتلهه هسه القهر
وتوصي خيط الفجر
بلكت يمر بالعجل ..
ينطيهه لكمة أكل
رادت جكاره وغطه
وفراش دافي الحضن
جي ماتت من البرد
اتدخن وتنتضر ...خلصت كل التتن..
والليل كاعد يون ..
ويبوس جف الكمر
والكمر ضل يعتذر
ميريد يطلع بعد
ويخاف من النجم ..(خاف النجم ينفجر)
بصحراء ضعنه كبل وهسه احنه ضعنه ابحر
وشنهوه يعني الفرق ؟؟
بالحالتين اعتقد
ميتين من العطش
ميتين من الصبر
لا قافله الي تمر
ولابينه ننطر سفن..
لو كلنه نطلع سوه
لو نسكت وننطمر
واتمنه لو نتحد وشيصير لو نتحد؟؟
ونحرر احنه الشمس ويرد بدينه الضوه
وندوس ذاك الحزن
ونعيش بس بفرح
ومن يجينه الصبح
نغني كلنه سوه
نسم علينه الهوه
من مفرق الوادي
ياهوه دخل الهوه
خدني لبغدادي
مع تحياتي