انا وليلى لو انا واللجان

[ابو كاطع]

السلام عليكم ورحمة الله وبركاته

طبعا انتم حتما سامعين اغنية كاظم الساهر
اغنية انا وليلى

ماتت بمحراب عينيكِ ابتهالاتي .. واستسلمت لريـاح اليـأس راياتـي
جفت على بابك الموصود أزمنتي .. ليلى .. ما أثمرت شيئـاً نداءاتـي
ـ ـ ـ ـ ـ ـ ــ ـ ـ ـ
شنو علاقت هذه الاغنية مع اللجان
وانت تكتب في المنتدى السياسي
سؤال حلو هسه اجاوبكم
بس انطوني عطوة واشوية مجال
ماتت بمحراب عينيكِ ابتهالاتي

هاي الابتهالات انطتكم عمرها بعيوين ليلى
وعرائضي وطلباتي ماتت في مقرات اللجان
تكتب طلب
اي طلب طبعا طلب مشروع
راسا الاخ المسؤل يكتب على الطلب
يحال الى اللجنة المختصة
وذاك يوم وهذا يوم
ما كو لا حس ولا خبر للطلب مالتك
زين

واستسلمت لريـاح اليـأس راياتـي

خو هسه انت واني اهل الطلب شنسوي نسلم امرنا لله ونكعد ونسكت وننتظر اللجنة او اللجان اشوكت راح تنظر بالطلب
خو رفعنا الراية مال الاستسلام منين من ورى اللجان
زين

جفت على بابك الموصود أزمنتي

اشكد صار احنا ننتظر اللجان تقرر وتوافق على اي شيء يخدم الشعب
وابوابهم مسدوده وتفتح بالارقام السرية لناس وناس
خو راح الزمن علينا وكمنا نرجع ليورى خو هاي ما يرادلها شرح اكو واحد ما يعرف شنو حال العراق وشلون صار والزمن اكل وشرب علينا
زين
ليلى .. ما أثمرت شيئـاً نداءاتـي

اشكد صيحنا
ياناس يا عالم ياحكومة يا برلمان يا لجان اشوكت تنحل مشاكل العراق
اكو واحد طلع وكالنا حجاية بيها حظ وصدك
كل سوالفهم ملمعه ومضروبه بوليش ورنانه وفارغة مثل بطن الطبل
هسه عرفتوا علاقة انا وليالى وانا واللجان
زين
اسمعو
لجنة من 14 خير ووجاهة كولت مسالسل باب الحارة راحوا يجتمعون يقررون منو الاسماء الي راح ترشح لرئاسة الوزراء
زين الله عليكم هم سامعين هل شي من قبل بدول العالم الاول والثاني والثالث
وجزر طفه الضو والحكني ولو بيك قوة الزمني
لجنة لتقصي الحقائق في كل انفجار
زين وين صارة هاي الحقائق الي يتقصونها منتظرين مصباح علاء الدين يجاوبهم
الناس استشهدت وخلصت الاربعينية مالتهم ودورة السنة ولحد الان اللجنة تتقصى
زين دنطوهم راتب لذولة اليتامى مو ذوله يشورون بيكم والعباس تبقون تركضون والعشى خباز
زين
تم تشكيل لجنة لدراسة موضوع حل النزاعات بين العراق ودول الجوار
زين هاي اللجنة شراح اتسوي واشسوت لحد الان
اكعدوا كعدة عشائر وخصموه السالفة لا تبقون اتلفون وادورون
الي عليكم انطوه والي الكم اخذوه
زين
تم تشكيل لجنة لمعرفة اسباب الحريق الذي وقع في وزارة الشفط واللفط
ووزارة كلم ايده اله
ووزارة ال بيت فلان
ووزارة بيت الحجية ام فلان
ووزارة الحاج فلان
ووزارة السيد فلان
ووزارة الدكتور فلان
ووزارة الاستاذ فلان
زين وين صارت هاي اللجان اشسوت وعرفت الحريق
نعم
عادل امام يقول
رقاصة وبترقص
هسه الجواب نعرفه
مس كهربائي
خير ان شاء الله المهم السيد الوزير ما صار عليه شي
هاي هي البكه براسك وهواك العم عليه
زين
اسرائيل قتلت انصار السفن التي تريد كسر الحصار
تركيا قررت اعادة النظر في علاقتها مع اسرائيل
وكل العالم طلع الي ندد
والي شجب
والي استنكر
والي بعث على السفير الاسرائيلي في بلده وسلمه رسالة احتجاج
والي طلع مظاهرات سلمية
والي حرق العلم الاسرائيلي
لكن العرب
شكلوا لجنة
لغرض ان يختاروا اي
رئيس او ملك او سلطان او قائد
ليكون ممثلا عنهم في الكلمة التي تحتوي على
3
جمل
ويخطاءبقرائة الكلمة التي تحتوي على 3جمل
ب
4
جمل
سوف تقولون
اشلون هاي هن 3 ويغلط 4
لان بالاخير ما كاتبيله شيكول
مع السلامة
لو
السلام عليكم ورحمة الله وبركاته
لو ايكول باي
لو ايكول
מפרץ بالعبرية
Tchau بالبرتغالية

وان ليلى موتت كل احلام كاظم الساهر
واللجان موتت كل احلام العراقين والعرب
في الختام
اشوكت الله يفرج علينا ويخلصنا من اللجان
وما اكثرها واشلون خمط بيها اويلي يابة
كلها شدات وسفر وفنادق درجة اولى وسهر للصبح وكيف ودكدكة ووناسة
والعراقي
يشور بيكم والله يشور بيكم
شوفوا اشسوى بلي قبلكم
خلاهم طشار
بس ليش ما تتعضون اشوي
عمي ما ادوم لحد يمعودين
كافي لجان

[الحــر]

وعليكم السلام ورحمة الله

حياك الله يا ابو كاطع المحترم

والله ماكلت باطل حبيبي هو هذا الواقع

لا والي يطلع مظاهرة ويندد وشجب صار مكروه بعد خوية

خلينا نطبع ويه اسرائيل ونفظها واقع حال ولابد ان نرضى به

وخلصت ارواحنة وهالجان شيخلصها ..!!؟؟

لك جل تقديري واعتزازي

الف شكر الك اعيوني ابو كاطع

موضوعك هذا عالجرح

والي حجيته كلش كافي

ندعوا من الله ان يجفينه شرهم وشر اللجان

تحياتي

[* البتول *]

اخي الغالي ابو كاطع
مواضيعك روعة بكل معنى الكلمة
كل حرف كتب فيها على الوجيعة
لله درك ايها العراقي الحر الاصيل
نطقت بالحق كل الحق ورب الكعبة
حياك الله وجزاك كل خير
ربي ينطيك الصحة والعافية ولا ننحرم من قلمك الحر ياحر
تحياتي