الحذاء نووي العراق 00للشاعر الساخر// محمد أبو زيد الأسيوطي

الحذاء نووي العراق

/ للشاعر // محمد أبو زيد الأسيوطي

شفتوا البجح

خربها وقعد

علي تلها

وأخرتها قال جاى

يصطلح !

دمر بلادنا وشعبنا

خد خيرنا منا وغصب عنا

كتير نهبنا واغتصبنا

في أرضنا

شرد ولادنا والبنات

بالمداس

عدي وداس علي عرضها

وكتير فرح

فينا

ووقعنا في بعضينا

وبعنينا بكينا

وكل يوم بإخبار حزينة

بنصطبح

ورانا ذله

ما شوفنا أبدا زيها

وبعد دا كله

ولا هاموا

وجاي مستحلي دموا

وكل شيء فاكروا أنتهي

قال جاي عامل مؤتمر

كان منتظر

يآخد كمان منا نيشان

ولا وسام

وشهادة تقدير وامتنان

تحمل معاني

الشكر ليه والاحترام

علي انه شال

النووي

من كل البلاد

علي انه عاد

ينهي المهمة الصعبة

ويفض المزاد

بضحكة منه ولا كلمة

بالضبط وفي نفس الميعاد

كان فاكر إنه

ح يتمدح

جاي بيكايدنا

وفي بلادنا

اللي بكانا في عيدنا

بالدموع

وسقانا من كاس الجراح

عود نسائنا ع النواح

وفي كل بيت ليه

فيه شهيد

أو أرملة أو فيه يتيم

باليتم والفقر أتكسه

وسقانا م الويل والآسي

كان مدرسه

للظالمين

اعدم وحطم

ياما لطم أبرياء

وبأيده شوفنا الموت

وكام خرب بيوت

والكل صار

مش لاقي قوت

موتنا جوع

شرد وجرب

ظلمنا وبألف نوع

وسقانا من كل

المظالم

وأخرتها فاهم

إن ذنبه يغتفر

!!!!!!!!!!!

كان مفتكر!

أن الشعوب معدتش فاهمة

لسه وآهمه

ولسه خايفه من الخطر

كان فاكر انه بكلمه منه

لما ح يقول

بعتذر

ح نسامحه ننسي

دمنا

نفرش له جنه في أرضنا

وناخده بالحضن الدفيء

حضن الحنان

طبعا لا يمكن يوم نطيق

بعدوا ثواني عننا

غير إننا

طبعا ح نفرش له الورود

ونقوله مرحب

بيك ويا زينه الرجال

أهلا وسهلا

بيك في أرضك

اللي مليانه بشلال

الدماء

ملكك وطبعا تحت أمرك

لو تعود

والأرض بترحب

وشهداء العراق

حتي الضحايا

والدموع فوق الخدود

وفي كل شبر وكل ذرة

من تراب

وطني الجريح

متلهفة ليوم الرجوع

والاحتفال

علشان نشيلك بين حبابي العين

وتسكن في الضلوع

ونسكنك بين الرموش

يا بوش وكمان ابن بوش

لأحسن تكون

فاكر كمان أن العرب

ما بيفهموش

ولا يعرفوش رد الجميل

دانت الأصيل

وابن الأصيل

داحنا نشيلك والجميل

ده مننكروش

حتي لو أنت في يوم

نسيت

احنا يا بوش ما ننساهوش

واديك رجعت

وتانى جيت

عراقنا

وفي قبله وداع

شفت الحفاوة اللي هيه

شفت الشعوب الحرة

والناس الآبية

وشوفت التحية

في

ضربه حذاء

مش منتظر

بس اللي كان شايل

جميلك

دا العراق كلها

كان نفسها

علي طول تجيلك

كان كل طفل يتيم

جايبلك جزمته

كان نفسه يديلك دليل لمحبته

واللي اعتقل واللي أتسجن

كل الوطن

كان جاي يعلن رغبته

في الاحتفال

يوم الوداع

تبقي الحفاوة

بالجزم

أحنا العرب أهل الكرم

لأجل ما تبقي الدنيا

فاكره

وتبقي عبره للأمم

ولكل من باعوا الذمم

دي اخرتك

ويا زيدي صحيتنا حقيقي

بضربتك

ورفعت بإيدك الهمم

ويا بوش طاطي وانكسر

يا عره الحكام

ويا رمز الرمم

ربك رايد لك

تتفضح

ولا كان حسابك يوم

ح يبقي لينا كلمه

لامم كلابك جاى

وناوي تمحي امة

تسلم أيدين الزيدي

لمه

ضرب وسمي

باسم الإله

وولادنا أهمه

وهوه دا

عدل السماء

وابقي تعاله تاني مرة

ابقي دور وابقي فتش

علي الحذاء

اهو هوه دا

النووي

في بلاد العراق

شكرا لكم وتحياتي

الشاعر // محمد أبو زيد الأسيوطي

[ام فيصل]

كل الشكر لك اخي العزيز الأسيوطي

كلمات جميلة سلمت يداك واحييك على هذه الروح العالية

وتحياتي لك يبو زيد

شكرا جزيلا وتحياتي وتقديري للمرور الكريم

[الشاعر ماجد الدعمي]

تحيه لك اخي الكريم من ارض العراق وشكرا لهذه الروح العربيه
والاحساس العالي بما يعانيه شعبك العراقي تحياتي لك ولكل اهلنا
في ارض الكنانه