المن جاي ؟؟ (مساجلة بقلمي )

[علي الغنيمه]

لسهام الوكت صرت آنه طير امريض
كلهن صوبني وماخطن مرماي
وانته الجنت اظنك توفي وكت الضيج
صرت انته الجرح والعله وانته الداي
المن جاي ؟؟؟
توسدت المنايه وحاربيت الموت
وذيال الندامه اتخوط وي ممشاي
وانته الماشلت عينك تشوف اشصار
بيه ولاكدرجفك يشيل اوياي
المن جاي ؟؟؟
ياطعنة غشيم وركست ابوسط الروح
وشما ردت المهه ايلوح سمهه اجلاي
ياطبع القحط بس بالسوالف فيض
من هدني العطش !! جاوين ذاك الماي ؟؟
المن جاي ؟؟؟
تانيتك اعيون انعصر بيهه الضيم
وتكطر دمعهه ابين ادين اعداي
ياوشلة اظنوني وظل خيال الراح
ياوسمة حزن غطت فرح دنياي
المن جاي ؟؟؟
حفنه اسنين مرت والقفل بالبوب
منهو الفتح بابك شلك بهالراي ؟؟
منهو الذكرك جاكلي وشدلاك
يالخلبصت غزلك بين ذيج وهاي
المن جاي ؟؟؟
انه ياما انتظرتك والكلب مطعون
تاليهه اعله ايدك سال نزف ادماي
يالجمة جرح كل ما تهزه ايسيل
ياحسرة ندامه ودمعتي اوبلواي
المن جاي ؟؟؟
ياما ابعطش روحي اتخيلك نهران
يمدمع العيون الحد وشال اضواي
كيضك مرمراني وخاب ظنهه الروح
وماظل للصبر وشله وكطعت ارجاي ؟
المن جاي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
**************************

[أنثى شرقية]

ياما ابعطش روحي اتخيلك نهران
يمدمع العيون الحد وشال اضواي
كيضك مرمراني وخاب ظنهه الروح
وماظل للصبر وشله وكطعت ارجاي ؟
المن جاي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟



عاشت ايدك كلمات وشعر روعه
تحياتي

[سلام الدراجي]

الاخ الغالي علي لا تعليق على هذه القصيده
لاني اصغر من ان اعطي رائي بها
سلمت يداك اخي الفاضل ورمضان مبارك عليكم

[علي الغنيمه]

ممنون من الغوالي حماكم الله وكل عام وانتم بالف خير شكرا لكم