سليمة الى استراليا بحفظ الله ورعايته

[انجي العراقية]

سليمة الى استراليا بحفظ الله ورعايته

ستسافر سليمة الى استراليا ، لتتزوج من ابن عمها ارحيم الاسترالي الجنسية ، وبهذه المناسبة التاريخية والعزيزة على قلوب الجميع، اقامت ام سليمة حفلة توديع في بيتها ، دعت اليها جاراتها اللائي انشغلن بمسح دموعها على فراق ابنتها ، وسفرها الى قارة استراليا المليئة بالكناغر .

رسمية خالة سليمة مدمنة فضائيات من الطراز الاول، فهي عاشقة هيفاء وهبي التي تعتقد انها شبيهتها في شبابها ، هذه الخالة جلست تقدم النصائح تلو النصائح لابنة اختها فأول شيء طلبته منها هو تغيير (اللوك ) يعني تعديل جهرتها وجعلها (مودرن) ، قصت لها ظفيرتيها وذهبت بها الى بيت صبيحة الحفافة ، لتقوم بواجبها على اكمل وجه ، عادت بها الى البيت وباشرت وشم جسد البنت المسكينة برسوم وكلمات اجنبية وعربية ، (حتى ارحيم ليكول اجيتيني متخلفة وكلشي متعرفين واني سويتج ادمية) ، فقد رسمت على كتفها الايسر عقرب اسود ، وكتبت على بطنها (اه ونص )

وبعد الانتهاء من هذه المهمة النبيلة اعطت الخالة الحنون دروسا خصوصية في الحياة الزوجية فمن (كلوباحمر ابو الستين) الذي يجب ان يضيء غرفتها يوميا بعد التاسعة بتوقيت استراليا المحلي ،الى نوعية الشراشف الناعمة الملمس ،الى ملابس النوم والبخور والبقلاوة التي تقدم كوجبة مهمة قبل النوم ..انهت الخالة رسمية دروسها بتقديم ورقة ملفوفة بقطعة قماش خيطت بعناية لتضعها العروس تحت وسادتها لتطرد الجن والشياطين الاسترالية تحديدا،

الان جاء دور العمة ،التي اوصتها باطاعة الزوج والامتثال لاوامره وعدم رفع الصوت امامه وعدم الذهاب الى السوك او للعيادة الشعبية او للجيران بدون علمه ، كما اوصتها بالنظافة وكنس باب البيت يوميا ونشر البسط والبطانيات على السطح (من تطلع الشمس) وان تكون (مرة شاطرة ) تكعد من غبشة تخبز وتطبخ وان لاتتشرط وتاكل الي الله قاسمه وتشارك رجلها بالحلوة والمرة.

وبالاضافة الى هاتين الوصيتين يمكننا تسجيل مجموعة اخرى من وصايا الجارات العزيزات

* بنيتي الاجانب مايحبون الغيبة والنميمة والقال والقيل ،ديري بالج تكرضين احد كدامهم
* الاستراليات عيونهن تكتل ديري بالج من الحسد ،يومية اقري المعوذات ونامي .
* الاجنبيات سمعهتن موهلكد لاتختلطين بيهن هواي ، تره يجرنج للطريق .
* مو تتبواسين وية الزلم مثل مايسوون بالتلفزيون تره هاي عدنه مايلبس عليها ثوب
* خلي بالج على رجلج تره الاستراليات ياما هجمن بيوت .
* اذا كالولج (كود مورننك ) يعني صباح الخير واذا ( كود ايفننك ) يعني مساء الخير
* اذا قدمولج عرك لوبيرة كليلهم (ثانكيو فري ماج) بلاعيمي توجعني .
* مو كل يوم زعلانه ، ترى الطيارة كروتها كلش كلش غالية .
* اخذي وياج كاسيتات ردح حتى تتذكرين الثورة .
* اذا قدمولج بيبسي موتشربي كله ، جنج ماشايفه ، خلي منه شوية بالبطل
* لاتذبين تنكة الزبالة بالركن ، ترى راسا يجوج الشرطة .
* اذا سألوج شيعية لو سنية كليلهم كلنا مسلمين ماكو فرق .
* اذا طلكج ارحيم ، بس كليلهم هذا ارهابي وانت معليج، يصلخوه صلخ..وداعتج يودون جلده للدباغ هذا الساقط .
* اذا واحد غمزلج لاتكولين لارحيم عليه ، سوي روحج ما شفتي ترى تصير بالتواثي
* مو تفلين بالكاع ترى يغرموج ورقتين .
استمعت سليمة لهذه النصائح القيمة واستاذنت الجميع لتنام ، الجارات زعلن و لم يرق لهن تصرفها هذا ، خاصة وهذه هي اخر مرة يلتقين بها لانها ستسافر غدا ، خرجن على الفور زعلانات وعقدن مؤتمرا في منتصف الشارع جاء فيه

* والله سليمة اذا مالعبت شاطي باطي هناك وفضحتنه اني مو سعيدة
* يمعودة عبالج اتوب نفس الشي، راح تكض الباب وتأشر للرايح والجاي
* هو ارحيم ما لكه غيرها ، لو سألني جان عددت كل فتوكها
* بالله هي هاي شكولات مال استراليا ، همه عايزيين كناغر ورايحتلهم سليمة ام بوز
* هسة هو ارحيم شلونة ، يكولون حتى باستراليا بعده املح وسنونة طايحة وكصته امشكه ويبيع غاز بعربانة
* اذا سليمة مافلتت ويه شاب استرالي اشكَر وتعال ياعمي شيلني ماتسمى باسمي
* وين الله ويرجعوها من الحدود عبالهم كاولية
* انشالله باستراليا وتطك عليها عبوة .
*لا يمعودة هاي هي تزرع عبوات

كتابات - شلش العراقي

[الامير العراقي]

اذا طلكج ارحيم ، بس كليلهم هذا ارهابي وانت معليج، يصلخوه صلخ..وداعتج يودون جلده للدباغ هذا الساقط



هههههههههههههههه
مشكوره اختي على المجهود
عاشت الايادي المبدعه
دوم التواصل
تحياتي

[سامي المشكور]

هههههههههههههههههههههههههههه
حلووووووووووووووووووووووووووووووووووه
شكرا لك والله ذكرتنا بسوالف العجايز صدك هذا حجيهن
تقبل تحياتي

ههههههههههههههههههههه والله روعه
دوم الابداع و الاروع الردح

[الغربه]

ههههههههه
اندوشت من حجي العجايز هههههههه
وشكرااا للطرح الخفيف

[حسام فارس]

هههههههههه
جميله جدا
كلام عتيك
واحاديث امهات المنطقه الشعبيه
تسلمين يا غاليه

[علي لفته]

ههههههههههههه حلووووووووو يسلمووووووووووووووووووووووووووووووووووووووووووووو

[انجي العراقية]

شكرا لكم نورتو ........وانتو الاروع