مطاردة شعرية (بالابوذية )

[الشاعر محمد الحميداوي]

طر كلبي حبيبي شلون يا طر
مثل وجه الفجر من لاح يا طر
طير شما عليت النوب ياطير
تردلي انه الغصن وتلوذ بيه
((مما راق لي ))

تحياتي الى عزيزة كلبي فاتن

حياك ابو جاسم الوردة ومشكور يالغالي


احب صوتك واحب للعود دكات
وزماني شلون اله وياي دكات
وخلص كلبي وماظل بعد بيه دكات
وترد روحي من يمر اسمك عليه

حرف الراء

[امنيات ضائعة]

رياك العسل من فركاك مرا
وحب شخصك علي كل ساع مرا
جنت باليوم اشوفك الف مرا
وهسه شوفتك حسرة عليه
حرف الفاء

حلوه يا امنيات

فكدتك وانته اعز عالروح مناي
يمن صوتك لحن شفاف مناي
مني يا ليالي الهجر منـــــاي
يجي يوم الوفي يرجع اليـــه

مع كل الود
( حرف النون )

مشكور يالغالي وحرف النون نكول

نـحـب نسمع كلامـك مـن تمرنا
حـلاوة وطـيب للـياكل مـن تمرنا
تـمـيل البصـره كلـها مـن تمرنا
ولـك شـط العـرب ياخـذ تحآيه
حرف الياء
وسلامتكم

الله يا فاتن العزيزه ياريت تنورون البصرة ونخلها وتمرها وشط عربها وناسها بجيتكم

يروحي شبيج لو عيناه فاتن
يروحي الجبد ينفت ليه فاتن
يروحي اهواه سبع اسنين فاتن
يروحي اهواه واقسم مو بديه

مع التحية والاعتذار لأستخدام الاسم ولكن هذا عرفانا منا لذكركم البصرة

حرف الهاء

مشكور ياروكان معروف عن اهل البصرة الطيب والكرم

ونكول بحرف الهاء

هاك اشعل كلب كلبي و وجهاك
اعله حاله راح اعلمنك و اوجهاك
بشالك من تلف شعرك و وجهاك
تلف روحي مثل لف المنيه

حرف التاء

تحياتي

تحياتي يافاتن وتسلمين على روعة الابوذية
والك حرف التاء
تعبت وبعد ماني بأمل وصلاك
وتركتك بيد واحد احد وصلاك
جمر اهواي لو فد يوم وصلاك
تعرف شكد اثر هالنار بيه

مع احلى تحيه

حرف السين