صحيح اضحك ولكن بيه اهات
لئن طبع الضحك مبني عله احزان
لبست الضحكه ثوب تغطي الجروح
اخاف من الحجي ولا يشمت انسان
لسان النار يحرك من تدانيه
بس اخرس حرف ما يحجي اللسان
يسيل المستحه بدمعات العيون
والكال الخجل بالكصه غلطان
تشوف اهل الكرامه ترخص دموع
بس للباعه يبجي هواي بطران
كلبت الدفاتر واقره السطور
ولكيت بكل سطر مكتوب عنوان
اليضحكك مو صديق ويوكف وياك
وحجي البجاك لو تسمعله ربحان
باوع عيب روحك وانسه العيوب
واستر عيب غيرك صير ميزان
قطار العمر يمشي وبي محطات
محطه احباب بيهه واخرى عدوان
مره تشوف اعمه ولكن يشوف
يشوف بعين ربعه الخوش صحبان
بحر دنيانه هايج روجه ماهاد
يريد الاوه موجه يكون ربان
الدهر مهره وتلاوي زنود التراب
اذا جمحت بعد شيفيد العنان
عله خدوده الشمع دمعات روحه تسيل
نفع للغير روحه وهو خسران
لذلك لا تدك باب الفرح دوم
وابقه مكابر وخاويهه الاحزان
وابقه بلون واحد حربه لتصير
لئن طبع الحرابي تغير الوان
الجبل عالي وصلب بس داسته اجدام
ما فاده الكبر بالدوس ينهان
لذلك صير ورده تعطر الانفاس
اليكطعك ما يكرهك بيك فرحان
بقلمي
محمد الحميداوي