لشوكت تبقى ابغربتك يا غريب////او لشوكت ليلك بصفنه اتواكحه
ولشوكت تتعذر اخطوط العبور //// والرصيف ايزاعلك واتصالحة
خلصت عمرك محطة بلا قطار //// لان جرحك ما عرفت اتصارحة
ضيعت من ضمك الصدرة الحنون//// وفاركت كل وجه جنت اتصابحه
هناك من اتشوف ليلك ما هو ليل ////ومن تشوف اليوم مثل البارحه
تشتعل بيك الهواجس والضنون ////وتحترك بيك الايام الرايحه
جنت شجره ويحتفل بيهه الربيع ////مأوى صارت للطيور الجارحه
وجنت اضنن كل وكت ما غيراك //// لسى توافي وباب كلبك فاتحه
لا تواعدني باوراق الزيزفون //// وانته عنكود العنب ما لايحه
صح جعت وتلوعت بس ما شكيت ////ولا توسلتك تشيل الطايحه
انت تعرف موقفي وفاهمني زين ////والصور كدام عينك واضحه
هاي شده وداعتك باجر تزول ///اومن ترد ما تلكه جف اتصافحه
انه سامحتك والمسامح كريم ////والحجالك عني الله يسامحه

*********
؟؟؟؟؟؟؟؟؟؟؟؟؟؟؟؟؟
احزان الامير كانت هنا

القصيدة منقوله للامانه