معجزه

[عباس الفرطوسي]

يالتسأل أعلى العشگ أنته الك هالمّيزه
صرت بنهاية سطر مامش وراه فارزه
يالگتلي وصفّني الك وصفّتك بمعجزه
مشيتك آمر حرس تمشي وراه مفرزه
ومن تحچي وأسمع ألك چني أحچي وي فنجزه
شيشة عطر من تمر ريحتك متميزه
شفاف ما لون الك جام وذهب طرزه
والماي كلش خشن لاجلدك يبززه
شعرك خسوف الگمر وبلون عمري الجزه
والوجه قرص الشمس ما نوصل المركزه
وهلال راس الشهر حاجبك من تغمزه
ورموش نبله ورمح بالگلب متمركزه
وعيون ما تنگحم الصد الهن تجنزه
والخشم ويه الحلگ بس شفّتك تحجزه
وأشفاف الك من عسل جوريه ومحززه
واسنون وگفن سره ما بيها كل جربزه
المعجون مال الطبخ بس وجنتك تفرزه
والرگبه نومة طفل ما نگدر انفززه
والنهر شگ الصدر وتلاله المبوّزه
وتل أعلى صدرك كبر هنياله اليهزهزه
ما ياكل اكل البشر وطحينه النخبزه
لن بطن مامش شفت ويالظهر صارن وزه
ولازگ بچفك شمع بالنارلاتغرزه
ورجلين الك من ورق گص گلبي واتعكزه
مقصّر تره بالوصف يالوصفك معوّزه
المركز الأول الك وبكل ثقه تحرزه
وتبقى انته نص الگلب عصفوره ومعززه
ولو يوم اشوفك رحت صدگني أنصب عزه