مجنون بهواك وعازة المجنون

من يحجي اعلى كيفه اسوالفه يهدهن

لان اشواك عندي من الزغر لليوم

الوليهن محنه وما مكعدهن

اخافن من تمر ويسمعن بخطوات

رجلينك يفزن بيش اهيدهن

انا بطرك النفس ظليت بس عيون

باني احلام هشه وكاعد بسدهن

وأناطرهن مثل فلاح زارع ديم

جفونه اعلى السحابه الفايته يشدهن

صار سنين الولي وهايدات وياي

اذا هجن يخايب تكدر تردهن

من يوم العرفتك صيحن فرهود

ذني الفرهدني شبيك فرهدهن

كربهن عليك بحضنك مأمنات

دنيتك عليهن ليش تبعدهن

ما بزلن عليك همومهن وياي

غير اللهفه الك والحسره ما عدهن

حيطان الكلب سونه معرض شوك

دكن كل صورك فنك تعدهن

فتحنلك الف باب بكلب محتار

ليش تعمدت بيبانك اتسدهن

ماتلكه بكثرهن لوتفر الكون

هو الكون كله يحبك بكدهن



بقلمي

محمد عبود العبودي