حاللينــــــــــــــــــــــــــي * الـــى روح والدتـــــــــي

[الشاعر جلال البطاط]

يمه ما ردتج مراره ونار تلهب بالمشاعر
لو حزن دنيا بكبرهه تلفلف بوجدان شاعر
انت امي جلمه ما توفيهه حكهه وطيبهه سطور الدفاتر
ما طلبتيني وكلتلج مره حاظر ولا طلبتج مره وتعذرتي باجر
جنتي ايه ومر صداهه يدوي بس ابيت كافر
وجنتي جنه وانه ادم والوكت شيطان شاطر

لله درك ياعبودي على هذهِ المقطوعة الوجدانية الرائعة..وجعل الله الجنة مثوا والدتك ورحمها ورحمنا الله سبحانة وتعالى ..لكَ جل احرامي اخي الغالي.

اخوك

ابو سامر

[علي الغنيمه]

حالليني الموت عفته ابابي واكف مااستاذني ودخل وحالليني
جلمة محالل ييمه تزيح من ظهري جبل
يمه لتموتين سكته بموتج يموت الامل
حالليني الاوف عند الله جبيره شلون لو والد زعل
يمه لتموتين هسه انتظري بلكي نشوف حل
عمري لو يرهم فديته لخاطر عيونج بدل

يمه وكتي وياي ظالم مارحم فد يوم بيه
لا تعوفيني اعلى بختج مايحن كلبج عليه
يمه ردتج بيدج ترشين كبري وهالحلم ما صح بديه
يمه ردت ادموعج تغسلني لاكن بوك باكتني المنيه
انتي مو كلتيلي اريدك للوكت ذروه وتجيه
يمه بستانج كبر بس الج ما صار فيه

وانه شجره وخظرت بدموع عينج بس ربيت بدون في
ما انطيتج يوم ثمره ومن تجين تفيض كل كيعاني مي
انت ما عزيتي اي شي وما اخذتي بيوم شي
عشتي دنيا وياي سوده وانت وجهج يملي وجه الدنيا ضي
يمه بس كليلي يمه كلشي ميت بيه يصحى يصير حي
عمري ضاع خلاف عينج ونطوى باهاته طي

يمه ما ردتج مراره ونار تلهب بالمشاعر
لو حزن دنيا بكبرهه تلفلف بوجدان شاعر
انت امي جلمه ما توفيهه حكهه وطيبهه سطور الدفاتر
ما طلبتيني وكلتلج مره حاظر ولا طلبتج مره وتعذرتي باجر
جنتي ايه ومر صداهه يدوي بس ابيت كافر
وجنتي جنه وانه ادم والوكت شيطان شاطر


بقلمي
محمد عبود العبودي

الف رحمة ونور لروح المرحومه التي انجبت اخونه المبدع ..تحياتي واشواقي ياغالي