تعال
تعال اشتعزف الالحان باذن الناس تجليبه
تعال اجفوفنه من الضيم كسرت مغزل الطيبه
تعال وناشد الديوان وينه الجان بي هيبه
تعال العيب كام ايصيح وينه اليستر العيبه
تعال ابعازة المعتاز منهو اللي يفك جيبه
تعال الماتجيبه الذات ماظل مستحه ايجيبه
تعال المامرتبه الله شلون ايصير ترتيبه
تعال الحزن فر دولاب والذل ابدواليبه
تعال اشفرق للغركان ؟؟ لو مطرة شته اتصيبه
تعال
تعال وخل عمرنه ايصير دمعه ابهور البتيره
تعال انشد عزيزالناس بيش انباعت الغيره
تعال الليل ذاك الليل والطالت مشاويره
تعال وليل المسامر ينشد عن نواطيره
تعال ابعازة الكطره نهرنه بلا نواعيره
تعال الوكت لاعبنه لعب جاهل على طويره
تعال وصنف الينباع والينشره بهالديره
تعال
تعال المنجل اتكسر بدينه شلون نحصد ؟؟بيش؟؟
تعال وخبزة التنور هانت وي رغيف العيش
تعال ابجرف من همنه غركنه وجنه نعبر كيش
تعال الصحبة البذات ماذكرت عتاب وليش
تعال وحيد والدنيه مصايبهه عليه ابجيش
تعال
تعال الدنيه لعبة زار
ذب واحد .... واحسبه ابشيش
***** تمت *****