هذا انا اليحذرك دوم مني اعثر
انا مثل اللغم بس اندحك انغاض
بس طخني كبل لطيح تتطشر
ما عرضت عيوني بيوم خنت الزاد
لا عرضت الحلوه ولا عرضلك مر
الماعون دنك مستحي وخجلان
شال الزاد وسفه وبيك ما غزر
واطيك الضهر متغدره تعرف ليش
مو لنك اصيل وزين ما تغدر
اطيك الضهر لن بينه كل الزود
عدنه اضهور صلفه التعوج الخنجر
اذا جفك رجيج اتلاوه وي الغير
بيهه الموت ادينه ومو حجي اتكشمر
انته الفاس بيدك ما حفرت الكاع
وانه بخمس اصابع حافر المرمر
وما رد الغلط لن هذا غيض السان
طبع بيه اليسبني اعله الغلط اصبر
طبع السيف ساكت ما يسب الناس
بس لو ضرب واحد ضربتهه اتعور
فرق بين الرعيد الصوته هز الكون
رغم صوته انتقام وماكدر يمطر
الا الغيم ساكت بس سمع بالكاع
شال الماي كله وعل ارض حدر
واذا جف الغدر طيحني ما انغاض
مهي نفس الجفوف الطيحت حيدر