يومية انتظر باچر يدكَ الباب
شواطي بعقلي حيرة مدن وجزرن
ومن كَد ما اجي بصفنة واروح هناك
نسيت المن اتاني وانتظر المن !!
..
علة باب انتظار عودّت العيون
حل بيهن تعب بس هنة ما رمشن
ناديت بحياتي ردي والعينين
ردتلي حياتي وهنة ما ردن
اعرف بالامل اصعب عذاب الشوكَ
وبحفنة صبر كل ليلة أأملهن
عن كلشي يصومن الا هذا الباب
اذا التفتن قسم باللحضة اكفرهن
من يبدي الصبح يتعوذن الشيطان
ويتعوذ ابليس بليل لو مرهن
حبلة عيوني اهات ودموع اشكال
وذا خلصن مطر اجفوني امطرهن
يا حسرة شكبرهه ؟؟ .. لو تحس بهاي
دمعهن چن يكَول ارجعلي لو دمعن
وكم ارجعلي صارت وانتة ما موجود ؟؟
يدورن عن اثر يبچن ويسمعهن
بعد بيهن طراوة خدودي لا لتخاف
واذا جفن ابد روجات انكَعهن
يصبن من تمر يم خاطري المكسور
ويصبن لو يمر فد يوم ميصبن
شنو نفع العيون بلاية دمع يسيل ؟؟
ويا حظ الدموع البيك اذرفهن

محمد العبيدي