اعله مودك وحدك
جبت الشعر وياي
لان هي القصايد
تعشك عيونك
سفينة شوك انت
وكلبي مبحر بيك
وشبيدي اعله ناس
المايعرفونك !!
اعله مودك وحدك
جبت الشعر خجلان
ومقصره القوافي ومايوصفونك
يبو شفايف عسل
والطول نبعة خير
ماتوا من قهرهم ماينوشونك !!
انت الشوك كله
وانت مرسى الشوك
وشوك الناس كله
فضال ماعونك
مسودن بيك اني
مكيف اني بهاي
يامجنون ليلي شلون
ينسونك ؟
يبو شعر الذهب
والليل منه يغار
ومن كد ما غضتهم
هيج يرمونك
ع شفافك غفت
بسمه والم واحاه
وما تنفك طلسم
وشما يكتبونك !
اشم عطرك واهيمن
وارضه بالتابوت
لو حظنك يصير
واقره بعيونك
اعله مودك جيت صدك
وانت ماي العين
اشريك بحياتي لو يبيعونك
تستاهل حياتي لو يبيعونك



ماجد الشاعر