الى كل مغرور...زهير العقابي

[الكناري يونس الجبوري]

هضيمه البشر من ينغر
وعلى الخوان يتكبر

اظنك شاعر وحساس
وشفتك بالغرور اصغر

عاملتك اخو وشديت بيك الراس
وصرت بكل قباحه وياي تتشطر

يغثك لو شفتني بحضرة الطيبين
وانت بليس يمك كل وكت يحضر

بيضت الاسامي وكلبك اسود ليش
كلب حاسد العندك ونته شر بشر

مثل لعبات جاهل تلعب اوياي
وانه ادري الغشيم بلعبه يتكسر

ادري حسين مات بكربله عطشان
لجن بسمه النصر لليوم يتسطر

ولك ابن العاص انت الشوه التاريخ
وعلي حامل رساله وفكره المعطر

تتظاهر بعفه وانته كلك شين
اعرفك زين اعرفك كافي لاتنغر

تريد تبوكني وانه حج بيت الله
ونته بسبحتك عل ناس تتبختر

احترمك واكلك انته كلش زين
متغزر محبتي شنهي ليغزر

ثوب بليس لابس والجسد شيطان
ومن عنده البراءه بسرعه تتبخر

انه ابن المدينه العبت على بليس
ونته وياي رايد تلعب او تفتر

تربات المدينه وبيه سبع حظوظ
يا لتربات غيره اشبيك تتحسر

احذرك وانتبه لا تلعب وياي
تره بشر الحليم النار تتوجر

امكشر بالردتها بليس للشيطان
يلوك الكل ردي شينات تتسطر

حب بحب اعيش وروحي تهوى الناس
وليركب طريق الخير ماظن يوم يتعثر

حب بحب اعيش وروحي تهوى الناس
وليركب طريق الخير ماظن يوم يتعثر


كلماتي ...مسلطه على قلوب لايعرف الحب مكانه عندهم..الى الذين يستكثرون على الغير كل شيء..ظنوا انهم الافضل ..
رسموا لنفسهم ما ليس فيهم..
اعلم ان قصيدتي هذه ستعود علي بشيء من الغضب..لكن انا نذرت كلماتي لقول الحق

زهير ناصر العقابي

دع المغرور يغتر لايغثك حيل
واصعد فوگ فوگ نجومه وتكبر

ترى ابن الكديشه الما ابوه حصان
اذا يصهل ابوه حمار ما يگدر

واذا شفت الاصيله ما تجيب حصان
لغفها حمار غرها بلونه الاحمر

ليهمك حچي الحساد والخاسين
ما يسوون والله نارك التسعر

ونعم منك زهير وشاعر الاهوار
انا جيتك تراني الحين اي واگدر

اطلع من عدوك ثار فوگه ثار
انا مجبول طبعي الطيب ويه الشر

لاتهتم زهير لهذي الاشكال
واحذف من خيالك عاد كل قشمر

انا جيتك يخوي وعزة المعبود
وكل شعر البجسمي ثار واتقشعر

انا سيفك يخوي ونار في يمناك
فزعتي لك وخلها شلون تتفسر

انا ابن العراق الما يلزمه لجام
وانا عندك يخوي وشانئك ابتر

زهير العقابي
صح الله لسانك يخوي
هذا ما جادت به قريحتي وارتجلته لعيونك الان
ولا تغث حالك
وكفانا الله واياكم شر الغرور
انا اخ للجميع ان رغبتم اخوتي
تحيتي لك