شاعر يرثي اخية في ذكرى الثانية لشهادة اخية

تراوالي: البارحة أجيتك
بعد ذاك الفراـﮒ الدام ويدوم
اولـﮒيتك بيك بعدك بالجفن سهران
تتنطر يمّر ـﮒ ضيٍ!
اولكَيت الموت خطارك
مثل ماﭽان كَبله"الفرح" خطارك
اولكَيت الليل ذاك الـﭽنـفنك بيه
"نهر أعمى" تخورس والنواعي البيه
يطويها الصدى ليل ابتوالي الليل ينداح

موت ابموت يطوينه ابزمن خدران
مهو العُمر اليمُر بينه- حين احنه نمرنه بيه
ضبابة ليل أصفر تحدى بينه الشوف
سراب ابكل عطش يندهنه ونفوت
وهم يطوي وهم والضي يطوينه اعلى حده فيّ
وينك...؟ يوينك...؟؟
يل بكَايه الشوف بعيونك
ظلت بالظلام السوّر اسنينك
تشع او تنطفي هالات تسهر فجر بعيونك
وينك؟...
/والصدى من تالي الظلام المآخذك ليل
يرتد لي بس: وينك؟...
واطوف ابظلمتك مااشوف غير اطيوف
تطويني صور مابيني او بينك!
وينك؟...
مهي كلها"دراويشك"....
خدر بيها الركَص والليل والشوف الغدى ابلا شوف
اونكض بيها الحلم من نزفت اعيونك
بكايه الروح لحظات بيها امتد زمنها انزوف
وينك؟...
آنه ابشوفي أشك روج الظلام
اوهلبت اعيوني تدليني عليك
اوهلبت اعيونك تندهني ابضواها المنتجي بيها
اونتهجس درب ياخذني ويجيبك
...............
وآناديك ابكل قوافيك التناديك
رد بيك
حتى الخرس بينه ينده اعليك:رد بيك
رد النه اولا تخيّب ظن
حروف اتحلمت فد يوم ترد الها او ترد بيك[
.............
أبد لا، لا ...
لاتنشدني ع البيّ!
ولاتحجي لي ع البيك!!
مهي دنيانه ويانه مثل ماجانت اوياك
تحاذينه او نحاذيها اعلى حد الموت والموت
طيف ايغيب بينه اطيوف
خطت بالضوه فوك الضوه اطيوف
اوتظل بينه تدولبنه بين الصرخه الصمته
حياة ابلا حياة اوموت كبل الموت
اوضمير ابلا ضمير ايحاسب الذات
من ايشوف شوفه ارتد شبح يعميه
والصح للغلط يحديه
وايامه ابظلامه اتصير
ابلا غايه اومصير اولا درب يهديه
............
تعذرني امن اجيك او أوكف اوياك
وافضفض بالذي ياذيك من تدريه
شعبنه او ناسك الطيبين
عصف بيهم ظلام الكون
وتعاصفت بيهم بالظنون اظنون
او عراقك ذاك غدى نهب ابنهب
وسيوف المجازر والغدر بيه
راحت بالجنون التنفلت بيه
تحد الموت بالموت
اوصفت ذيج النفوس الباد بيها الحيل
ليالي اتعشعش ابكل ليل
خيانات اوغدر/اورخص حد العهر/اوعذر يخزي العذر
/اوكبر يحفر كبر/اوعمر مابيه عمر/اومنابر عمماها الكفر/
اوصبر مله الصبر/ اوحروف ذله الحبر/ اووطن أهله ابهجر/
او عراقك ذاك ماظل بيه عراق الينذكر
.....................
كفك ياحزن عن كل دمع بيك
اونادي ياشعرنه اوخل صداك ايجيك
قوافي اعلى القوافي اتشد وترها
اوكل عزفها ايرتلك بيك
صور ظلت بالضوه اللي بيها تضويك.
....................
اجيتك ارد اسامر بيك روحي واسهر اوياك
كل ليلك هذاك البيك يمتد
بحدوده الما تعرف الحد
يلن بي الحنين اتلفت الذكراك
اوماكدرت صبوته عن خاطره ترتد
اشتهيت انعيك
بالنعي التكوله الناس ع الناس
بس بيّ الشعر بآسمه طلب ينعيك
اوعلى السانه يكلك بيه
لو تدري القوافي هسه راح اتموت
جاعلكت معانيها بيارغ ضي
تتموكب نواعي ادموعها ابيوت
تبني من حزنها اعليك ايقاع الضوه والشوف
والنبض العزف ترتيله بسكوت
ورد بالروح والروح
مابين الأمس والباجر اليطويك
صدى ايلملم صدى وانت
تظل مثل أنت ذاك البيك
اعلى امن الحجي اليحجيك
والشعر الذي تعليه اويعليك
ويظل ذاكره ابذاكرات الناس ترويك
صوت أبعد مده من صوتك اليحديك
...................
يهنيالك!....ميت اوتحجيك؟!
اويهنيالي!...لساني اشوفك بيك
حلم يضوي حلم/نجم يهدي نجم
/زلم تحدي ابزلم/اوجرح عشك اعلى عشك الناس
تهجس بيه من ايطيب ياذيك
وأنشدك....
اولاتجاوبني
بس أنشدك عنك اومنك:
جم موته متت والكيك
بعد كل موته عايش بيك!
شنهو انت تعيش الموت
لو هو الموت يرحمنه من يردك بيك حي بيه؟
.............
أظن مابي الاودعنك بالصحيح اوداع
يلن مابيّ الافرزن حد بين الملكًى والتوديع
ولا بي الأعوف اطيوف تندهني
أرد بي كبل مااضيع
ولا بيّ ابوحشتي البيّ أظل بيّ
هذاك شاكر اللي بيه
يكدر من يعوف ايعوف
ماهي دنيانه.....
يل خذاك افراك ذاك الليل
صارت لي كلب بنزوف تحدي انزوف
.........
وأختم وكفتي وياك واقرى لك...
تسابيح السكوت ابسورة الوجدان
يلي يتمت القوافي/ اودمعك البين الجفافي/
اورعشة الحب حين يشتد التجافي/
الموت حلم ابلا حلم اوليل يضوي ابنور غافي/
يلن كل شي بعده بيه يصفي أصفى امن التصافي
لاجن....
اوصدكني لاجن
لو كدرت ابخطوه اودعك
اهجس ابطيفك يردك بي من بيك اويحومي
دمعه لابيها التطيح
لاولابيها التعوف الجفن غافي
يل مكانك عفته من بعدك يتيم
لا تظنه ظل يتيم
ماهو لسه مملي بيك كل ذاك مكانك
اولسه بيه اضيوفك ابطاريك تلهج
ابحجيك او نبضه حنانك والشعر من ينشعر
والفرح حتى الفرح
ذاك الحلمته ايجيك من عهد الزغر
لسه ينشد ع الذي ايغنيه ويجيبه عمر
الفرح نشوة ضمير ينتشي ابرشفة ضواه
اليفرش الظلمه فجر
................
مكانك لسه مملي بيك
والسمر بيه السهر يتنطرك تحيه
مثل ماعوديته اشما انتهى تبديه
والعمر أمره أمر بيه نهجس كل فرحنه
ايمرنه نجمه ابحد ضواها تنكسر
لاتكثر عتابك ع اليمرك ضيف
مهي الدنيه سراب او طيف
اتجيبنه صدفه اعلى حدها
وبصدفها ترسم الخطوات بينه
اوكبل باجرنه تجيب النه الكبر
اونظل- مهما نظل- نمربيها ومض نجمه
نزف ضيها اببحور الليل
شراره اتجر وراها من ضواها سيل
...........
اوطويل!....
طويل الليل ينطرنه ورى كل ليل
اشما صده قدرنا اوراد صده الحيل
اوسرابات الثواني التمرنه بيه تمر ابلا زمن لاحد
اويطوينه الظلام اوبس نظل نطويه
ابلا عصر اليودعنه ابعصر
اولا فجر اليجيب النه فجر!
...........
مكانك لسه مملي بيك
والشعر ياهر بالصبر يتنطرك هلبت ترد بيه
اوتنشد اشعندك جديد
اوهلبت اجناح الصدى ايردك صدى
ايقفي ايقاع النبض البيه يحديك اوترد
هم بيه تحديه
مكانك لسه مملي بيك
والشوك التململ بالصبر بالشوف ظل ناطر
مثل خاطر هجس خاطر
لو عابر ينتظر عابر!
والكاس السهر وياك ليلك ذاك
لسه اوياك تسهر لهفته تتنطرك بيه
ولساها القوافي البيك والبينه
تصحينه اوتناجينه اوتتنشد همس بينه
شنهو اتعثرت بيه الدروب او خطوته البيه
تاهت بالظلام المالكًى
لحدوده اول لاولا آخر!
...............
انا ما ناوي ازيدنك حزن
فوك ذاك السافرت بيه
بس اخبرك ابلايه دمعه اولا تشكي
اولا ولا حسرة اوتعب:
النخب مامل النخب
بس الطرب لساته مامرنه ابطرب!
...............................
لندن- يوتوبوري

17/04/2008 --------