إذا ابن آدم عيوب الناس يترصد (5)

محاولة متواضعة أخرى آمل أن تنال شيئا من استحسانكم

إذا ابن آدم عيوب الناس يترصدْ

الناس عيون عِدْها عيوبَه ترصدها

وإذا طبعه على الوادم يظل يحچي

عِدْها لسان وعيوبَهْ ترددها

واذا يمّك ذكر واحد عيوب الغيرْ

ثِقْ عِدْ غيرك عيوبك يعددْها

احذرْ لا تظل تترقبْ الزلات

لأنْ مو كل خطاياها اتّعَمدْها

ولا كل البشر مِنّ الخطأ معصوم

ولا ميّزكْ ربّكْ حتى تنقدها

واحذرْ تحچي عنّ الناسْ يَمّ الغير

لأنْ تخسر الناس اللي اكسبِتْ وِدْها

تاليها الندم ما ينفع وْيَه الناس

وغير الندم نفسك وِشْ يظل عِدْها

واحذر لا تظل تسمع حچي النّمّامْ

ترى النمام يسحِرْ نفسك يشدها

حِبْ للناسْ خيرْ النفسك تحبّه

لأنّ الخيرْ طبعهْ النفِسْ يسعدْها

ولا تعتقدْ ليك العمر راح يدومْ

لأنْ للأجلْ ساعة ومحّدْ يردها

العمر رحلة وقطار العمر مِنّ يفوتْ

الگبرْ آخرْ مَحَطّه وْياك يقصدها

إلكْ زاد اذّخرْ يابنَ آدمْ مْن اليومْ

ترى الوادمْ شحيحة وزاد ما عِدْها

حتى اليَحملْ شوي زادْ ما ينطيك

لأنْ مو كافي زادَهْ الجَوعته يسدْها

هناك فلانْ ما ينفعْ ولا ابنِ فلانْ

ولا اموال الچنت تجمعها وتعدْها

بَسْ الْينفعكْ حبك الْحامي الجارْ

چَفّه هناك بس الْشيعتَه يمدْها

دخيلك يا علي اتعنيتك بهاليومْ

وناسْ التقصدكْ ما خابْ مقصدْها

يقين احنا اعتقدنا وبيك آمنّا

بأنْ شيعتكْ عَنّ النارْ تبعدْها

يقينْ هناكْ ميزان العمل مِنْ غيرْ

حُبكْ ما رجحْ واعمالنا ترِدْها

ملائِكْةْ الجليل وهُمّ مأمورين

ما واحدْ يغيرك جَنْته يوردها

إذا بالحشر شانكْ هذا عند الله

عجيبة ال ينكرْ افضالك ويجحدْها

إذا گِلنا بعلي يا ربي وبجاهه

رمونا بالشِرِكْ چم تهمة ونصدْها

مو إنت المحمد بيك وصّى الناسْ ؟

إذن ليش الخَلَگ آذانها تسدْها

إذا گالوا ال حيدر "لا" ناتجها

يصيرنْ "لا" إلكْ وانت مُحمّدْها

عجيبة الناس ترجى الرشد من غيرك

وعگبْ هاديها غيرَكْ مِنْهُ يرشدْها

علي إنت الطبيبْ وبينا چمّ جْروح

مَحّدْ غيركْ يضمدْها ويشدها

اشكثرْ بينا جروحْ السبب حبيناكْ

ولو رِدْنا نعدّدْ صعبه شيعدها

إذا بينا نزفْ جرحْ احنا نتعنّاكْ

ولا نتعنّى غيرَكْ لأنْ مو گدْها

ودمتم سالمين