بسم الله الرحمن الرحيم
السلام عليكم ورحمة الله وبركاته
قصيدة للشاعر الأديب والأستاذ الكبير (( جابر الكاظمي )) من ديوان الأغاريد بعنوان (( المرقد الطاهر )) في مدح الإمام الرضا عليه السلام .
بلِّغ سلامي لمرقد إمامي
إگصد للرضا ابهمّه لو زرته ورحت يمّه
بلّغ سلامي لمرقد إمامي
* * *
من توصل ياالزاير يم الگبر الطاهر
واتقبِّل أعتابه
تلگه المرقد زاهر للبائس والحاير
تـتـفتّح أبوابه
بالماضي وبالحاضر هذا البحر الزاخر
يروي اگلوب آحبابه
وﭼفّه الخير الوافر هالمعصوم العاشر
كلّ الدنيه اتهابه
وجدانه جَسَّد هيبة محمّد
هـذا ثـامن اليـمّه لو زرته ورحت يمّه
بلِّغ سلامي لمرقد إمامي
* * *
هذا المرقد جنّه يزهي ويسطع منّه
نور الإنسانيّه
يا من تنشد عنّه شد رَحْلَكْ واتعنّه
للروضه القدسيّه
إطلـب ما تتمنّه يالـزاير واتهنّه
وعندي اوياك آوصيّه
حين اتطوف اذكرنه وآدعو الخالق النه
دعوه ابصافي النيّه
والباري لاشك يقبل دعائك
ابمشهد عاشر العصمه لو زرته ورحت يمّه
بلِّغ سلامي لمرقد إمامي
* * *
هالمرقد وآسراره تتواصل انواره
ما يتكرّر مثله
رب الكون اختاره ما خاب اللي زاره
واشماراد ايحصله
تطفح جود انهاره وتتفتّح أزهاره
بالفردوس الأعْلَه
هالكون وآثاره واركانه وأسواره
مخلوقات لأجله
شمس الكرامه ابأفق الإمامه
ذاته منبع الحكمه لو زرته ورحت يمّه
بلِّغ سلامي لمرقد إمامي
* * *
يالزاير نتأمَّل نسعي اوياك ونوصل
للطاهر وانزوره
ونعقد يمّه المحفل وبالمولد تتجمَّل
دنيانه المسروره
وكلمن رايد يسأل عن هالنور الأمثل
وآياته المأثوره
ابتاج العزّه اتكلّل هالسلطان الأوّل
بالعز يسطع نوره
بانت علايم شمس المكارم
نوره مصدر الرحمه لو زرته ورحت يمّه
بلِّغ سلامي لمرقد إمامي
* * *
ابهالموضع يتجسَّد نور الباري الأوحد
والمضمون اتوضَّح
كل العـالم يشهد تربـة جنّة مشهد
بالحگ تزهي وتنفح
والوادم تتودَّد توصل ذاك المرقد
حيث الزاير ينجح
للناس اصبح مگصد والــزايـر يتأيَّد
يكسب أجره ويربح
صار اختياره أجر الزياره
موضـع فـخر للاُمّه لو زرته ورحت يمّه
بلِّغ سلامي لمرقد إمامي
* * *
ﭼم مُعْجِزْ راوانه ونتفاخر خلّانه
ضنوة موسى الكاظم
من دهر العادانه يحمينه ويرعانه
ونتفاخر عالوادم
ولو نُمْرَض شافانه وهالمعجز برهانه
للجاهل والعالم
ذﭼره ايعيش اويانه واتسجَّل عنوانه
ابگلب الحر الفاهم
وابهالمناقب برهانه ثاقب
يا محله الرضا وإسمه لو زرته ورحت يمّه
بلِّغ سلامي لمرقد إمامي
* * *
ودمتم في حفظ الباري