عكس دوري الشاعر المرحوم محمدالغريب
بكل ناعور دار الماي
وانه تراب گام
يهيل ناعوري
وكل عصفور عله وطار
وانه بنص قفص
مسجون عصفوري
وكل شبچه تصيد الحوت
وانه بشبچتي
ما يحصل الزوري
وكلمن حصل الراده
وانه من الطلايب يبس حنجوري
وكلمن شرب چايه وراح
وانه اعله الوجاغ مثلج القوري
وكل ناطور عين الذيب ......
ماتغفه
وانه العصر
كام يغفي ناطوري
وكل بذره صفت شجرة
صفت بستان....
وانه وحيد هاي الناس
يبست ماتت بذوري
عكس دوري .عكس دوري .عكس دوري
المرحوم محمد الغريب
الجـــــــــــــواب / عباس الفرطوسي
النواعير التشيل تراب كلش زين
زنجر من وگفته سنين ناعوري
والدنيه التدور وياك خاف بصوچ
مشاكل دنيتي بلا صوچ منها الحملت لوري
واذا صطرتك الدنيه اعلى خدك يوم
من كثر السطر شلعتلي صرصوري
البخت وين البخت ليطير العصفور
مسنّح ماله كل جنحان عصفوري
خيعونك بذر عندك ويابس صار
أنباگن ماشفتهن راحن بذوري
تدور أعلى الزفر گلي شكثر بطران
عگاريگ وحيايه النايمه بهوري
ما لازم شبچ گلت اشتريه بفلوس
ومن فلوسي حتى استنكف الزوري
واذا چايك ثلج عالنار
چايي شد عداوة وزاعل القوري
واذا ناطورك التعبان غفه ونام
يجي سكران تالي الليل .....
وبيده يمرد المحصول ناطوري
عباس الفرطوسي