إذا محَّد يبوسك أذبح المحَّد

[محمد السوداني]

الواحد فرد مايقبل التقسِّيم
بس اني أنقسِّم، وبدونك أتعدَّد
اتقسَّم بدونك وأنجمع ويَّاك
لان كليِّ ويه كلك بيك يتوحَّد
چنت جاهل وأجيك أتشرَّد من الناس
هسذَه أتعلمِّت من نفسي أتشرَّد
عشگتك ذرَّه ذرَّه وصرت أغار إعليك
إذا محَّد يبوسك أذبح المحَّد
ولك لاتنطرح يم ناس تعبانبن
مو طولك حصاد اشلون تتمدَّد
وشعرك ليله ظلمه إتوحشت عل ريح
كلما هَّب عليها اتلفلفه بأسود
وفراشة نور إذنك، والزلف خطاف
مرَّة إيحِّط عليها، ومرَّة يتبَّعد
وجفنينك سِمَه ومجفي عله رمشك ليل
إذا ترمش يظل فرقد يطگ فرقد
يلعينك بحيرة بكل هدووء الليل
ودموعك نوارس لو مشت علخد
وعلى إخدودك صور منقوشه من بوسات
أباوع بالصور .. مابايسك أحَّد
وشفتينك شمس من تبتسم نصَّين
يگطعها البرق، وبنصها يجمَّد
وحنچك صدر بجعة إنصَّاغت من النور
إذا ماتت شمس، من نوره تتولد
ومثل زمزم رگبتك، نص ذهب، نص جام
وعين الماي هاي العالصدر ترگد
وأنام أباب صدرك، وأذنب، وأنخاك
گبتين الذهب ماتشفع لأحَّد؟!
يبو إيد الثلج، لاتطلع بتموز
مو خاف الثلج، خاف الخلگ تبرد
واذا لا مو ثلج كل هلبياض إمنين
معقولة العظم فوگ الجلد يصعد
يل چتفك منارة، بيا شرع، يا دين
أموت من العطش وگبالك أتشهد
وحدر چتفك فرات ودجلة ملتقيات
وشفت شط العرب جوَّه الچتف ممتد
يبو ساگ الگطن، ليش إفتحتلك باب
مو خاف الگطن بالعين يتفرهَّد
خطواتك حضارة، وخصرك التاريخ
اذا تمشي العرب فوگ الفرس تصعد
وعلي كل ماتمر يجبرُّني حِسِن البيك
اوصفنك لچن من وصفك أتردد
لذالك ماوصفتك، وأعتذر يهواي
وصفت الخيال المَّنك اتوَّلد..

للشاعر نائل المظفر

مع تحياتي

[سلام الدراجي]

عيني ابو جاسم اسويت بينه لو هذا الغزل لو بطلنه تحياتي لك وللشاعر نائل المظفر وشكرا لحسن الاختيار

[ام فيصل]

الصراحة لامكان لأختيار مقطع
فالقصيدة بأكملها تنهل منها العشق والغزل والتصوير الأكثر من رائع

يامحمد
احسنت الإختيار
ممتنة منك على هذه الكلمات التي اوقفتني كثيرا
والشكر الكبير للشاعر الرائع نائل المظفر

لاحرمنــاك عزيزي

[أنثى شرقية]

عاشت ايدك قصيده رائعه وكلمات اروع لشاعر كبير
نقل موفق اخوي الطيب محمد

تحياتي لك

[عراقيه غيوره]

تسلم اخي وعاشت الايادي على هذه القصيده الرائعه

وتحياتنا لشاعر نائل امظفر

شكرا لنقلك وننتظر منك كل ما هو مميز
اختك عراقيه غيوره

[محمد السوداني]

الف تحية شكر وامتنان للاخوة والاخوات الاعزاء للمرور الرائع بوركتم

لكم ودي وتقديري

[امير الاحزان:]

يبو ساگ الگطن، ليش إفتحتلك باب
مو خاف الگطن بالعين يتفرهَّد
خطواتك حضارة، وخصرك التاريخ
اذا تمشي العرب فوگ الفرس تصعد
وعلي كل ماتمر يجبرُّني حِسِن البيك
اوصفنك لچن من وصفك أتردد
..........................
الله الله يا ابو جاسم الوردة
قصيدة تستحق التصفيق
وبــــــــــــــــــــس
بس ورا البس هاي كللام في داخلي
خليني اضمه
ههههههههه
والله روعة
شكرا" لهذا الانتقاء
تحياتي الك اخويه الغالي