حنيت اعلى وكت شعيط
من دارت وجاني معيط
خلبصلي الوشيعه
وضاع راس الخيط
ضاع الخيط
من شفت الجوامع
اذنت للموت
من شفت المنابر
راح منها الصوت
من شفت الردتهم
حوت يبلع حوت
ذكرت شعيط وسفه
ودمعت بسكوت
وين شعيط
لا يكطع وشيعه ولا يخلبص خيط
وين شعيط
وين الجان بجفوفه
اللجام يلوك
جان يبوك
اي بس جان وحده يبوك
صح من راح
خلانه بطرك ناتوك
وصح وكته اعلى اهلنه
سنين ذب فتوك
بس خبزة شرفنه
توفرت بالسوك
وصح ما خله عدنه حلوك
هسه حلوك عدنه
ورايده الهه حلوك
هسه الليل نعسر
والنهار اطلوك
انطر والفجر مبخوت
يفضح صرخة المبيوك
كرهنه نطارة العكروك
وكرهنه جفوف ملت
تركع المفتوك
وحقدنه اعلى الابر والخيط
جيبوا شعيط
تهدا اعصابنه من ايعيط
جيبوا الجان من يخزر
يخوف الحوم
ولو بس يوم
خاطر لا جبان ينشف البلعوم
ولا ظالم يعيث بجثة المظلوم
ولا ولد الحرام
تكدر المحروم
ولا ملح الخيانه
يضمد الملجوم
جيبوا شعيط
مو متنه بزمان معيط
من رحمه اعلى روح شعيط
بقلمي
محمد عبود العبودي
بغداد
10 / 9 / 2009