ملعون الوكت خلانه طخينه

[ذياب الخزعلي]

ليش يهالوطن منفارك الاحزان
ومن يوم الطفولة الفرح ناسينه
صاراسنين ننحب موسنه وسنتين
وحنه من المأتم والله ملينه
الجادرمنصب والثاني ننصب بيه
وللدفان نفسه أردود ردينه
تيهنه العدد ماتنحصي الاموات
سني ايكول هذا وهذا شيعينه
موش ابيوت صارت مكبره واشباح
ومن كثر القهر ياناس سلينه
جم ام التصيح وجم طفل مرعوب
وجم مفقود مانعرف بعد وينه
من تفجير نركض كمنه للتفجير
ويصفرلون خدنه أتموت رجلينه
تاهت ياوطن ماندري وين الصوج
بالحكام لوشيطان مدفون بأراضينه
انريد ابهالوطن نلتم نصيراخوان
ونصون العراق وهاي نهرينه
ننشدللسلام انساند القانون
ولو طاح المسيحي الصابئي ايعينه
احنه المانمد الايد وهل الخير
تعقلهه من اكلك بره جدينه
واحنه المانطخ الراس يوم ابظيج
ملعون الوكت خلانه طخينه
رادونه أنتفرق والوطن ينباع
ويتقاتل شعبه اليوم مابينه
ورغمأعالحقد والفتنه والجيران
بالانباريلزم حرس بصرينه
وبكركوك مرسم يجمع الالوان
ويسمع صوت ابن ذي قار كردينه
واحد هالوطن مايقبل التقسيم
وبغداد تتغزل قوافينه
مع تحيات
الشاعر
ذياب الخزعلي

[سلام الدراجي]

تاهت ياوطن ماندري وين الصوج
بالحكام لوشيطان مدفون بأراضينه
انريد ابهالوطن نلتم نصيراخوان
ونصون العراق وهاي نهرينه
ننشدللسلام انساند القانون
ولو طاح المسيحي الصابئي ايعينه

والله يااخي ذياب لا ادري ما اقول قصيدتك جدا رائعه بس بوادر التقسيم اراها بعيني واهديك قصيدتي لعلها تشفي غليلك

ستة أسنين مرت والفرح مذبوح
بس دم ودمع بغداد مگلوبه
من كل زيج جونه اوشايلين الموت
أشباه الرجال اوجوه مچلوبه
معروفه الدعارة وشاليه بزود
ومن لندن اجونه أرجال مركوبه
دمروه للبلد أحفاد ابن كسرى
وخيراته أصبحت لأخوات معيوبه
چأن الوطن فوهة يحامي للجيران
وجازونه بعكس عبوات منصوبة
جيشك ياعراق أتخاف منه ألگأع
ساتر للعرب حماي العروبة
تشهد ألنه سينا وتشهد الجولان
وابن دايان يشهد عينه مسلوبة
وينك ياعلي وينك يداحي الباب
أحسين الوطن والرأس منهوبة
بغداد الفرح ليش الفرح حزنان
من شاف الشمس بغداد محجوبة
محجوبة عجب والنور چأن أيشع
من حمرابي سلته العلم مسكوبة
تفرج ياوطن بالفاله وألمگوار
وكل دم اللي طاح أيعده حاسوبه
ستة أسنين مرت چنه 6 ألاف
تاريخ العراق أمجاده مضروبة
قبله أنت ألچنت وكعبه للعشاق
ومنارة للعلم بغداد محبوبة
ابن خطاب أبخالد حرر النهرين
وطفه نار المجوس بسيف مثلوبه
وبعد ألف وربع نار المجوس أتعود
ونشوف الرصافي جثته مصلوبة
باگوه للرشيد ومن وسط بغداد
وألباگه يهودي بأيد مندوبه
والمنصور يبچي أيصيح ياستار
لإيران أصبحت تربتنه محسوبة
بغداد الحبيبه احمرت من الدم
ثوره وتشتعل والناس مكروبه
دولاب الزمان ولا تظن أيدوم
والدامت ألك ينتظر طالوبه
لابد يوم نصر الله يأتينا
والفتح أليچي آياته مكتوبة
ونشوف الفرح بعيون أبو النهرين
وبالعز والمحبة أتنور دروبه
تقبل تحيات
اخوك
سلام الدراجي

[أنثى شرقية]

تاهت ياوطن ماندري وين الصوج

اي والله صح لسانك ياشاعرنا


وصح لسانك ومجاراتك اخوي سلام الدراجي
عشتو والله
ربي يحفظكم من كل مكروه
تحياتي الكم

[ذياب الخزعلي]

تحياتي لك اخي وحبيبي سلام الدراجي
نعم كنت منهك من العمل وراح ادخل التعديلسلمت لنا
وتحياتي لكي اختناالعزيزة
احلام في الانتظار

مشكورين على الاشعار كلش حلوة بس تقهر انشاء الله تفرج ياعراقنا الحبيب

[ام فيصل]

رادونه أنتفرق والوطن ينباع
ويتقاتل شعبه اليوم مابينه
ورغمأعالحقد والفتنه والجيران
بالانباريلزم حرس بصرينه
وبكركوك مرسم يجمع الالوان
ويسمع صوت ابن ذي قار كردينه
واحد هالوطن مايقبل التقسيم
وبغداد تتغزل قوافينه

عزيزي
قصيدة رائعة بمعانيها
نقلت واقع مريروهموم مواطن فاض الصبر من صبره

الف شكر لك ولهذه الروح العراقية الأصيلة
ولابد بعد الليل تطلع شمس عالعراق

مع تحياتي لك

[ام علاوي]

اخواني الشعراء ذياب الخزعلي وسلام الدراجي
رااااااااائع ماخطته اناملكم
لايسعني سوى القول
ان الصمت في حضرتكم ابلغ

تحياتي لكم وجل تقديري
ام علاوي مرت من هنا