قصيده غزل وعتاب للشاعر نائل مظفر

[رنا العراقية]

أريد وياك افتح باب العتاب
وأكفر بالعشگ لو گتلي سدة

تنام أبلا مخدة ويخلص الليل
وانة كلساع شابگلي مخدة

صاير ما تحس كلش هلأيام
وحيل أتغيرت بيك المودة

تجر گلبي وتحبسة بطرف الرموش
لاعينك تشدة ولاتهدة

ولو خصرك سفينة وصدرك شراع
وتخدر كل هوة بصدرك تصدة

بس لاتنتفخ كلش على هواك
لانغرگ ولك يسمر تهدة

آنة اشگد اجيتك كفر الباب
من گد ما ألي تفتحة وتسدة

وانتة ولا أجيت بيوم يهواي
حتى بالعشگ گاظيهة خدة

هاي وياك صارت وحدة يهواي
وأمس بالليل هم مطلوب وحدة

كلشي الزين بيك وكلشي مو زين
حچيتة وبلهوة ظليت أهدة

أشوف الزين كلة الأذنك أيروح
والموزين من يمك تعدة

يسباح الشواطي أشبدلك شوك
ليش اتغيرت مو چنت وردة

وأشوف الناس گالت هذا يهواك
وعليك ايدور وجهة اشما تعدة

گلت لا چي حلو مو وجهة اليدور
خدة أيدور حتى أيبوس خدة

وجناتك شمس تحرگ بالگلوب
والما يحترگ يحترگ جدة

احترگ جدي بهواك وشيب الراس
نسيت اشلون كل ذيچ المودة

شتگل للناس ما يعرفني چذاب
ولا شعري لعب جولة على زندة!!!

وانة الچافي العمر من فتحة الزيج
والليمون فوگ اچفوفي ندة

اعددلك شكو بجسمك مسامات
وأسميهن بسمهن وحدة وحدة

مو آنة الخلقتك ونفخت بيك
بس الخالقك ظليت اعبدة

تذكر من چنت تتشابگ وياي
شعرك روج احسه وچتفي سدة

يشدني وأرد أشدة وما أشد شي
لأن خيط الشمس محد يشدة
لأن خيط الشمس محد يشدة

شكرا لقرائتكم

للشاعر نائل مظفر



تحياتي رنووووووووووووووو

[محمد السوداني]

اعددلك شكو بجسمك مسامات

وأسميهن بسمهن وحدة وحدة

مو آنة الخلقتك ونفخت بيك
بس الخالقك ظليت اعبدة

تذكر من چنت تتشابگ وياي
شعرك روج احسه وچتفي سدة

الله الله قصيدة اكثر من رائعه
كلك ذوق يا ذوق
الف شكر اخت رنا للانتقاء الجميل
تقبلي تحياتي وودي

[القناص ستار]

مع احترامي الكبير وودي الصارخ للشاعر الكبير الكبير جدا نائل المظفر بس شرد اكول اخاف اجرح احساسك الاتعتقد عزيزي الناقل ان القصيدة ...........................في الابيات الاخيرة تذهب بطريق اخر

[رنا العراقية]

مع احترامي للشاعر الكبير نائل المظفر اولا عزيزي الناقد ان الشعراء قبله قد تعمقو بالغزل والرومانسية

وثانيا انا لم اتمعن واتعمق بالمضمون وكلامك قد جعلني انتبه



ولا اعلم هل امسح لو ابقي القصيدة اترك الامر الى اامشرفين اذا كانت القصيدة بها اي شوائب انا اعتذر على النقل

مع تحياتي

[سلام الدراجي]

گلت لا چي حلو مو وجهة اليدور
خدة أيدور حتى أيبوس خدة

وجناتك شمس تحرگ بالگلوب
والما يحترگ يحترگ جدة
عزيزتي رنا عاشت ايدك على النقل قصيده رائعه ولا ذنب لكي على المضمون والمعنى في قلب الشاعر تحياتي واحتراماتي

[سهر]

تسلمين عمري كلج ذوق


ننتظر جديدك

[احسان الجنابي]

تحياتي الك يارنا ياعراقيه اتمنى ان تفرحي وتبتعدي عن الحزن مع تحيات الجنابي

[بلسم الروح]

الله الله يعجز اللسان عن وصف اعجابى بكل كلمه

غاية فى الابداع والجمال والاحساس نقل موفق رناوى تسلمين ياذوق