يا وطن..

[هاشم نجم]

من سجن لسجن جبت العمر يعراق
وعليك بكل وكت إمسلطه كفارك
لسواد أعيون شعبك ماإجاك إنسان
إجت كلها لسواد أعيون أبارك
ما باسوك أخوتك وأنت خد الكاع
ودمعتين على طولك يجرن أنهارك
بسك ياوطن لا تشعل إلهم نار
غموك العرب وإدفوا إبنارك
ذلتنه الدول وردينه مكسورين
بس أنت الغريب إمدلل بدارك
مثل حاتم جنت تذبح فرس للضيف
بس شعرة فرس مايسوه خطارك
يجدي الماي زرعك وأنت ذو النهرين
خلصت العمر تسكي بزرع جارك
زرع جارك علا ما مد عليك إفياي
بس مد تربته وعبرهه لسوارك
مو امريكا ثارك لا ولا صدام
كون من العرب ناخذلك بثارك
لا تزعل علي من حقي لو مليت
منهو إبكدي إحتمل وبضلعه مسمارك
منهو جرحه على طوله وأنت دربك سيف
وإمتاعك ملح وإيكمله مشوارك
برده غطته وظل خايف إبراهيم
وأنا بطرك الجلد وإتحملت نارك
كادوني بحبل وإعيوني معصوبات
ما طلعوا حرف من خزنة أسرارك
بعد إشكثر بعد مو أنا الأول ذاك
داراني الوكت وأنت الوكت دارك
من جف اليسلم خدي ضل إيخاف
من كد مابجه من إجفوف سطارك
وأنا بيا وكت يسطرني هذا وذاك
كبل وي الهوه من يسطرني أتعارك
وعذرتك ياوطن لأن أني طيب ذات
لو غيري وعلي ما يقبل أعذارك
لو أشرف شعب بالدنيا هاي إشبيك
جا جمله بمزاد إنباعت إديارك
بس إحنه وعلي جم مره طكنه الجوع
وبعنه إهدومنه وما بعنه زنجارك
وغيرك ياوطن لو إلنه حق نختار
نعوف الدنيا كلها ونرد نختارك
دينارك سقط وإنسحك بالرجلين
بس يسحك دول من يمشي دينارك
إلمن تشتعل شو كلهم إبن زياد
بس أنت الحسين وشعبك أنصارك
نلطم على الصدر كلما سمعنه أخبار
خلصت العمر دم تنزف أخبارك
أمس كصن شعرهن بابل وأشور
وشكن زيجهن من باكوا أثارك
سبوا سومر بعد شمتاني يابو الهول
وبرج بيزا إغتصب بالليل عشتارك
صاير ماتشور يا بو ريح إعزيز
باكوك اليهود وباكوا إحمارك
وباكوا كلشي وباكوا ورقة الميلاد
ونسينه أنت بعمر يا أدم إصيارك
أمس بيك إحلمت جنك نبي ولحكوك
وعلى إفراشك لكيت ينوح كرارك
وثقت بصاحبك بس صاحبك جذاب
بس عنك زلف دلاهم أثارك
وتسحك بيت العناكب وأرملاته تصيح
وبقت روس الحمام إمطشره إبغارك
لازم تفتخر بس أنت اللي إختاروك
مقبرة الأئمه وربك اللي إختارك
يا أشرف وطن وأقصى بأرض ذوالموت
اليريد إيضل عدل يتغطى بحجارك
ولكن يا وطن إعذرني لو ضجيت
أنا كلبي عليك وناري من نارك
تظل لياوكت طف أنت للأجيال؟؟
وتظل لياوكت تذبح أنصارك؟؟؟؟
وتظل لياوكت يوميه تنطي إحسين؟
ومثل زخ المطر تتساقط أقمارك
وتظل لياوكت أهلك سباية روح؟؟
وأرماحك ركب وإمدخنه إديارك
وتظل لياوكت ساكت يبو الحسنين؟
مو شك الغمد مولاي ذو فقارك

للشاعر المبدع
نائل المظفر

[محتاره]

الله ..كلماتـ راائعه ومؤثره

سلمتـ اناملكـ على النقل الرائع

وصح لسان الشاعر المبدع

مودتيـ

[هاشم نجم]

محتاره
نورتي متصفحي
شكرا للمرور والرد الجميل
لكي تحياتي

[الشاعر ماجد الدعمي]

شكرا اخي هاشم للاختيار المميز والجميل
ولذائقتك الجميله حما الله العراق بجهود الخيرين
وتحيه للصوت البصري الرائع المظفر / تقبل مروري وتحيتي

[هاشم نجم]

منور عزيزي
ماجد الشاعر
شكرا للمرور والرد
مودتي