ماشاف
أحبك واليحب مجنون ماشاف
وكلبي لغير شخصك أبد ماشاف
يظل جرحي ندي وللدوم ماشاف
بسبب هجرك يبو ذات الردية
وفلهه
علتك بالصبر عالجهه وفلهه
وروحك هل الوكت مامش وفلهه
بهيمه وسرفن ذراعك وفلهه
ولاشامت يفيلك بذية
فطراك رد على الشاعر الدكتور فلاح الزيدي
لون هاي الرساله تصير فطراك
أخذ روحي لونه يطيب فطراك
أظن ربك فلاح بشعر فطراك
وزيد بنعمة الباري عليه
2-وفاقه
بسمه كلبي لمع نجمك وفاقه
وألك حبي بكبر حبك وفاقه
أعيش بعسر بفراكك وفاقه
وصلك جن كنز ويحط بديه
علي فار
يفر كلبي على الكلبه عليّ فار
ودوك أغلك جدر روحي عليّ فار
العاذل شرك ناصبلي عليّ فار
أحبال وظيك الوسعة عليه
مر مر
الوكت غثني ولعد الريج مرمر
وعفاني شكثر عندي كلب مرمر
يصاحب لو وصلت الدار مرمر
أنشدك وأشتم رياح الثنيه
مرمر أنا
مر يامر زماني مرمر أنا
بعد وبنكد وبهم مرمر أنا
طبعي ويه المخادع مرمر أنا
وسهل وي الذي بيه الحمية
زيدي
يدنيه بظيمج وبلواج زيدي
عليّ وأصبح فلا ينظاك زيدي
فلاح اسمه أنسب ياناس زيدي
أهل غيره وكرام اهل الحمية
ونمار
أنشدك عن شريج العقل ونمار
أعرفك زين تحمل طيب ونمار
طحت أنه بشبج صياد ونمار
يفرهدني تعال ألحك عليه
وشتماه
أسب حادي الحده بضعنه وشتماه
وأرد لتراب خلاني وشتماه
عبير الجرح يشتمني وأشتم اه
تظل تفوح حد يوم المنية
ماصحتلي
علي تمطر دنيتي ماصحتلي
وردت فرصة بحياتي ماصحتلي
أنه المايوم بسمي ماصحتلي
وكاحه وياك لو هو عناد بيه
منتدانه
عطر فواح ريج منتدانه
وسحر صوتك يشدني منت دانه
العراق أصبح يصاحب منتدانه
ويلم شمل الشباب الأريحية
منولينه
يرب العرش سترك منولينه
ستر وحجاب صرنه منولينه
أخذنه الدهر غفلة منو لينه
أرتفعنه بزود حماي الحمية
مالك
يدهري شبيك كلي وياي مالك
وياهو الطلع من دنياه مالك
أريد أنزل واحط بديار مالك
وأحشمهه اعله دهري المالجيه
وصادق
وحق سجادنه وباقر وصادق
أدور عل الوفي بحبه وصادق
حميد وخالد وياهم وصادق
صفو ياوسفتي حدر الوطيه
مهداة إلى جيراني الذين أغتالتهم أيدي الغدر
والدار
توحشني الثنية أعليك والدار
وماتزهي يجيهه الوكت والدار
تظل تطحن صبر رحاي والدار
فلاتبطل لماتدنه المنية
وشباج
أنه المايوم طحت بشرك وشباج
معارك وي زماني دوم وشباج
يروحي تيهيتي الدرب وشباج
مشيتي بلاوجاد وعرف بيه
عبرات
دموعي فوك صحن الوجن عبرات
وخلاني الوكت للناس عبرات
خلص عمري أصيحن دوم عبرات
متى الكيش يحصل ياخوي أليه
ولاجار
ابد ماتم خوي ألنه ولاجار
الدهر كثر نوايبنه ولاجار
ضريبة أعله الشخص يمشي ولاجار
ولجام أعله الحلك هاي الأذيه
طبعنه
لجام أعله الحلك صاير طبعنه
دار والوكت والليزر طبعنه
القاسي أشلون كلولي طبعنه
ابد ميفيد بس تعب وأذيه
لحدها
يدينة عليج ونيابي لحدها
خلص صبري تره وصلت لحدها
الدوارس بيت لبنادم لحدها
تظل تذكار لصحاب الدنية
الى الشاعر كريم الحجامي
يحجامي الليالي تزيد وجداي
وكمت ماشوف دربيه اعليه وجداي
المحبه موش كوه تصير وجداي
لجنهه ألهام من رب البريه
وشيله
عليك الدمع مايبطل وشيله
ولاجرحي أخيطنه وشيله
تمنيت المحب جاهل وشيله
وبوسه بلاذنب وبلاخطية
سجلهه
وحق تاريخ هالأمة سجلهه
ألك جلمة بقواميسي سجلهه
أترجمه وعربهه سجلهه
طلعت أنت الحبيب العاش بيه
رفرف
دليلي عليك يبن الناس رفرف
دهاك أجروح كلبي الحين رفرف
الكلب ريشه بوسط تيار رفرف
وعلى دارك شمرني وعم عليه
وشراي
يصاحب شل البصر كلي وشراي
بروحي ولاحصل سايم وشراي
كفيت الناس كل خيري وشراي
عجب ليش الملامه تلوم بيه
وبالك
أبيك وما ابي امك وبالك ....... الاب
واحذر جلمة الواشي وبالك...... دير بالك
صدك بالحب صرت معدي وبالك..... وباء
وعلى نفسك تحملت الأذيه
وهم لك
شكثر بجفاك ون كلبيي وهم لك
وعقلي غفل فاركنى وهم لك
شتظن انساك يالغالي واهملك؟؟؟
وانت بدمى دم تدور بيه
سالمني
دليلي أعليك يشكر سالمني
أذوبن لوجفوفك سالمني
سلام وياك اريدن سالمني
كظيناهه حروب وهاي هيه
وعت به
يعت بيه الوكت كوه وعت به
أعله حبك روحي مفطومه وعت به
أبيك آنه ألزمنه وعت به
وأشوف أشلون ماينطيك أليه
بسلاي
الخنساء تكترت والنوح بسلاي
ومن وجده عبيط الدمع بسلاي
حبيبي صار شغله وياي بسلاي
من شاف الوكت قاسي عليه
عركنه
أسم وسط الدليل أنخط عركنه ...... أقصد بيه أسم العراق
ويظل مثل الجبل ثابت عركنه
خجل ومن الخجل كلش عركنه
لأن ديرة وصفت لعوان أمية
سالت
سل الشمع روحي عليك سالت
وبدال الدمع دم العين سالت
عليك الناس يبن الناس سالت
تريدك يل الصفيت بيا نوية
منت جنه
أجن تاجك طلع منت جنه
وشسولف بيك كلي منت جنه
تعرف شيصير بينه منت جنه
نطلع البيت وندخلك هدية
شح الشام
زرع شامات بخدودك شح الشام
وشح المس شح البوس شح الشام
آنه من أرد أبوكنك شح الشام
الأحشمه بشوفتك ينهد عليه
للظيم
مثل أبرة وخيط الوكت للظيم
دكت أهمومك وأحجية للظيم
آنه برجلي رحت ومشيت للظيم
شفت الظيم يركض جاي أليه
خلهه
يصاحب لاتهيج الروح خلهه
وعساهه تموت بعد فراك خلهه
حبيبي الماعمل وياي خلهه
الموت أهون من أفراكه عليه
لاتنسو ردودكم