قصيدة للشاعر الحسيني حسين عبد الكريم الكاظمي
رد ضيم الوكت عني يابن جعفر
اجيت لكبرك وبهمومي اتعثر
رد ضيم الوكت عني يابن جعفر
يابن جعفر اريدن حاجتي ومني لاتتعذر
مهضوم وجيتك تدريني
اشلون بهالمحنة اتخليني
اجيت ودمعتي يم كبرك اجريهه
وروحي بالحزن والحصره اسليهه
ماغيرك يابن جعفر يداويهه
يالكاظم ماتنظر حالي
وتكشف هالغمة بدلالي
يابو طلبة والك شارات معروفة
حاشه بهالوضع جيرانك اتعوفه
ياباب الفرج بابك هاي موصوفة
ماخاب اللي كاصد ليه
وكل عله بنورك تشفيه
شكاي اعتنيتك من هضم دهري
ومن جور الزمان الي كسر ظهري
مال الحمل بيه ونفذ كل صبري
هد حيلي دهري وخلاني
اتوجه بهمي واحزاني
يابن جعفر دخيلك لاتشمت اعداي
اريد ارجع لداري وحاجتي وياي
وانت الما ترد كلمن كصد نخاي
جار وحك كل جار الليلة
هذا الهم عن جاره ايزيله
تقبلوا تحياتي
منقول
رد مع اقتباس
مشاركة: قصيدة للشاعر الحسيني حسين عبد الكريم الكاظمي
