عاشوراء
•للقاسم (عليه السلام)على لسان حال أمه (رمله):
شـمسـوّيه ذنـب يالـدهر ورده؟
إبسـهمك ســددت للگـلب ورده
تـوّ هرشـك يجاسـم زهر ورده
وگـبل وگـته يبـس بالغاضـريّه
• لأبي الفضل العباس (عليه السلام)
لـعب بالــگوم كـلما راد كـفّه
وبـذل مجهـود دون الحرم كـفّه
كل جيـش الگـصد لحسـين كفّه
وگـف وگـفة علي السـيد البريّه
• في مصرع العباس (عليه السلام) عن لسان حال السيدة زينب (عليها السلام):
يـلايم عـن أخـوي اللوم ينـبه
لـون حيّ ما حشـيم إيريد ينبه
العـلم والجـود والچـفين ينـبه
أخـوي إمشـمّره إشـبيده عليّه؟
في هجوم الحسين والعباس (عليهما السلام) سويّةً:
أبـو اليمّـه بخوته گـصد طفلها
ونـار التشـتعل بالسـيف طفلها
جـحافلها العلـيّه إزحفت طفلها
ونهـض عباس نادى النـوب إليّه
• عن لسان حال الرباب أم الطفل الرضيع (عليه السلام):
نــار الفرگـتك للگـلب تسـله
ودمـعتها بگـت للمـوت تسـله
لمّـك چـنت سـلوه وبيك تسـله
يعبـد الله ورحـت من بين إديّـه
• ((من يقدّم لي الجواد وأنا ابن رسول الله)) قالها الحسين (عليه السلام) فانتهضت بطلة كربلاء وقدّمت له الجواد فعن لسان الحال:
شـجاني الدهـر لعيـوني لخاها
إبچـفّه مـرّد إصبـيّها لـخاها
(جـواد) المـوت من دنّت لخاها؟
بس لحسـين أنا گـدمته بـديّه !!
• في وحدة الحسين (عليه السلام) عن لسان حال العقيلة (عليه السلام):
حـرب إخوتي إبيوم الكون لومه
ظـل الجـيش منـها كثر لومه
إمـن الباري تجي لحسين لومه
الإراده چا محى كل جيش أميّه
• عطش الحسين (عليه السلام) ولسان حال الشاعر:
إسـهام الدهـر صـابني وينـزار
ولجـرحي إخيـاط ما يرهم وينزار
على اللي إمن الظمه صادي وينزار
گـلبه وهـو مـهر أمّـه الزجيّه
لسان حال الشاعر عند مصرع الحسين (عليه السلام):
الدنـيا إنفـضت كـل غيّها وسمها
إبگـلب زينـب وجهلـتها وسمها
العـرش واللـوح ظل ثابت وسمها
عجـب ما ينچفن فـوگ الوطيّه؟
• مهر الحسين (عليه السلام) ومجيئه عن لسان حال الحوراء (عليها السلام):
عيـني إتـموح دمـعتها ولا ييت
ومـنها خـايفه روحي ولا يـيت
عسى يالمـهر لا شـفتك ولا ييت
إبـخبر راعيّـك إثـبات الوطيّه
• جولان الخيول على صدر الحسين (عليه السلام):
أمـيّه البسـت ثوب الذل وراضت
بيـه وما صـغت للحگ وراضت
عبـنها خيلها داسـت وراضـت
صـدر للـدين بـرض الغاضريّه
• الشاعر مخاطباً أمير المؤمنين (عليه السلام):
بچـيت إبدم لعند الأرض ناديت
الرواسـي الحالتي ولباي ناديت
الزينب ما سمعت إبيوم ناديت؟
يبـويه يا عـلي لحّـج علـيّه
• في حالة السجاد (عليه السلام) عند مصرع أبيه الحسين (عليه السلام):
سـطرني الدهر دم دمعي تيرّه
وعلى السـجّاد شن حربه تيرّه
شـلون النطع من تحـته تيرّه
(أميّه) ولا شرف عدها وحميّه
• لسان حال السيدة زينب (عليها السلام) عند السبا:
سـبت بالبر عگب ظلّي وچنّي
وزماني إسموم جرّعني وچنّي
جـنت بين إخوتي شمعه وچنّي
حـدر راسي أشـوفنها الثـريّه
• في ديوان يزيد لسان حال العقيلة زينب (عليها السلام) مخاطبة أخاها الحسين(عليه السلام):
صـبرك عجّب السبعه والأملاك
يخـويه وبالگلب ثابت والأملاك
بعد ما ظل صبر عندي والأملاك
وشـفافك تـنضرب وآنـه سبيّه
رد مع اقتباس
