بـوســــــــــــــــــــــــــة ... لـــ 21
___________________
كُل واحد وعشرين أيلول ....
الوكت يتبدل ...
ويصير نصَّين إوأبد ..
لحظة غلط ما يقبل...!!
@@
وانتَ إشوكِتْ ... گلبك عَليْ يتعدَّل ..؟
يا غاوي يا ريحان...
يانبعة عشگ يا إمعَدَّل...
يا طير حب احلولك ...
إبريش الترافه امحجَّل
@@
يا نسمه من نيسان ...
وتخلـِّي اليحب إمْعَلْعَل!!
آ يا سنابل شعرك...
الطوِّلت ليل إشتاي ...
وتظل أطول . . .
يا حلم جفني الياوكت ...
يبقى الجفن يتأمل!
@@
ياعلتي يالتنزف هجر .... يا جرح كلبي الطَّوَّل
يا نار بضلوعي إوْ تشب .... لو خوخ زيجك هدَّل!!
يا شهگة الولهان ... من يذكر وليفه الأول
يا فرحة المحروم ... لو ضاگ العسل بالمنحل
@@
يسمر يبو احجول الذهب ... چم دوب أظل أتوسَّل.. ؟؟
مرني ابحلم ... خَلْ جفني مِن .... طيف الوصل يتكحَّل
مَرْ صيفي بفراكگ سهر .... وشكثر خلگك طوَّل
واصبر على ابعادك قهر ... جا هيج خلـَّصت الدَّهر ...
والدَّمع سال إوْ وشَّل
@@
چا بعد إلمَنْ انتظر .. يهلال عيدي الما هَل ..؟
وأتنطـِّرك نجمة فجر ... وتأمِّلك وانذر نذر
وأصبر وگولن تسهل ..!!
@@
ويلالي بزلوفك ذهب ....
وخويط ليلو ..
او خاف اعگدنَّه
إو بعد ما ينحل ...!!
وآنا أحترگ نيران ... بشتاك اوتگلي إتحمَّل ...!!
@@
وبواحد وعشرين ايلول... الوكت يتعدَّل
وبعيد عرسك أنتظر ... وي لإعتدال إبكل سنه...
إبعشرين من أيلول ...يَلْ ما تسأل..!
@@
إو خِطرَتْ احجايه إو ماگلِتْ ...
گِتْ خاف اگلـَّه إو يزعل!!
بس ردْتَ أذكرَك ...
بوسه من شفتك ... عليْ منيتها إو گِتْ يخجل..!!
@@
يا عشگ عمري الأول
لا تحصد اجفوفك ... سنابل شوگ
لو هانت عليك ابمنجل
دليني وين الگاك ... دوهنّي الهوى إو ما أندل
@@
إيْ باللذي عز وجل!
أستحلفك والشوگ والعشره ... وهوانا الأول
بايام من صفَّگ عشگنا إوهلهل
بسَّك تِعتْ بالرّوح ... وتريد اليودَّك يقبل . . .
الحب معزَّه ايريد .... ونته اتريد حبَّك ينذل!
@@
وشگد مضن صيف وشتى ... وآذار ويلول ... إوعلي ما تسأل ..
والشيَّب ماخذني إو شعل .... راسي أبَّياضه إو ما ظل..!!
بس زلفك ايگطـِّر مسج ... وتميشَه ويصير أطول..!!
آه ياحلو يمدلل...
جا بعد بيمن أنتخي... ونته التسل ولفك سل!
@@
وبواحد وعشرين أيلول ... الوكت يتعدَّل
وتظل ولا تتبدَّل ...
شيصير لو طيفك غفل ... حدر الجفن يتسلـَّل
لا عيب لاهوه حرامي ... ولا درب ما يندل ... !!
@@
د. هاشم الفريجي
رد مع اقتباس